Díli, 22 Maiu 2025 - Sua Exelénsia Ministra Edukasaun, Dra. Dulce de Jesus Soares, akompaña husi Xefe Gabinete Ministra Edukasaun, Sra. Paula Araújo Corte-Real, hala’o enkontru kortezia ho Embaixadór Timor-Leste ba Índia, Sr. Carlito Nunes, iha Sala VIP, edifísiu Ministériu Edukasaun, Vila-Verde.
Enkontru ne’e, ko’alia kona-ba oportunidade dezenvolvimentu relasaun kooperasaun iha área edukasaun entre Timor-Leste no Índia, relasiona ho knaar Embaixadór nian ne’ebé importante tebes atu sustenta esforsu Ministériu Edukasaun nian kona-ba apoiu tékniku no kooperasaun husi nasaun ne’ebé Embaixadór destaka ba.
Sua Exelénsia Ministra Edukasaun, Dra. Dulce de Jesus Soares, hatudu agradesimentu ba vizita Embaixadór nian, no fó valór boot ba papél Embaixadór sira-nian, atu hametin relasaun multilaterál kona-ba edukasaun. Kooperasaun ne’e bele kontribui atu hadi’a sistema edukasaun Timor-Leste ho di’ak liután, liuhusi troka esperiénsia, treinu profesionais no bolsa estudu ba timoroan sira.
Enkontru ne’e remata ho esperansa katak, relasaun forte entre Ministériu Edukasaun no Embaixada Timor-Leste iha Índia bele kontinua metin hodi fó benefísiu ba jerasaun foun sira iha futuru.
#MédiaME
