Bobonaro, loron 15 fulan abril tinan 2025 - Diretór Eskola Sekundária Tékniku Vokasionál Dom Bosco Maumali Maliana Irmão Marçal Amaral Lopes, asina memorandu ho PT husi kompañia Sahabat Jaya bersama Sr. Gunawan Hendri hodi haruka estudante na'in-26 ba hala'o estájiu profisionál durante fulan rua iha Jakarta no Surabaya Indonezia, iha Eskola Sekundária Tékniku Vokasionál Dom Bosco Maumali Maliana, segunda-feira ne’e.
Iha intervensaun Diretór Eskola Sekundária Tékniku Vokasionál Dom Bosco Maumali Maliana Irmão Marçal Amaral Lopes, fó sai katak estudante sira ne'ebé atu hala'o estájiu iha Indonezia durante fulan rua, mai husi 12⁰ anu.
Iha fatin hanesan Reprezentante PT husi kompañia Sahabat Jaya bersama Indonezia, Sr. Gunawan Hendri hateten, ohin mai vizita eskola Sekundária Tékniku Vokasionál Maumali Dom Bosco ne’e atu hadia kooperasaun durante tinan rua, no interesante liu hodi asina tan memorandu durante tinan 2025 to'o 2027.
Reprezentante inan-aman husi estajiáriu sira, Sr. Francisco Soares, informa katak husi eskola Dom Bosco Maumali haruka oan sira ba estájiu iha Indonezia no sira kontente tebetebes tanba sira hetan oportunidade di'ak hodi aprende nune’e bele dezenvolve nasaun ida-ne’e.
Asina memorandu ho PT husi kompañia Sahabat Gaya Bersama Indonezia ne’e, hetan mós partisipasaun husi Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, Diretór Nasionál Ensinu Sekundáriu Tékniku Vokasionál Sr. Fernando Mouzinho Gama, Dirijente Ministériu Edukasaun nian, inan-aman, estudante sira.
#MédiaME
