Liquiça, Tersa-feira, 15 Abril 2025
Manorin Luisa dos Santos hahú hanorin iha tinan 2000 to'o tinan 2016, nia hetan moras to'o tinan 2020. Iha tinan refere manorin-na'in ne'e rekopera no kontinua servisu hodi hanorin estudante sira. Tanba ne'e Ministériu Edukasaun liu-hosi Diretór Nasionál Rekursu Umanu Sr. João Amaral hamutuk ho Diretór Nasionál Komisaun Funsaun Públika (KFP) Sr. Moises Pedroso no Tékniku Prestasaun Institutu Nasionál Seguransa Sosiál (INSS) Sr. Agustinho Guterres hala'o vizita espésial ba manorin Luisa dos Santos, iha Eskola EBC Leorema, Munisípiu Liquiça.
Hafoin Vizita, Diretór DNRH Sr. João Amaral fó korajen no motivasaun ba manorin Luisa ne'ebé durante tinan barak dedika-an hodi fó kontribuisaun tomak ba setór Edukasaun liuhusi hanorin estudante sira.
"Manorin ne'e sofre moras maske idade sei produtivu no seidauk atu reforma tanba tinan foin kompleta ba 47, tan ne'e ministériu iha obrigasaun atu kontinua fó suporta", hatete Diretór.
Iha sorin seluk, Diretór Servisu Edukasaun Munisípiu Liquiça, Sr. Julio da Silva hateten, Presiza junta médiku hodi halo diagnóstiku tanba haree de'it ba kondisaun hanesan ne'e maibé keta manorin ne'e afeita mós ba moras seluk hodi labele hala'o servisu ho di'ak.
Entretantu Manorin Luisa dos Santos hateten, hanesan manorin-nain, kursu komplementar remata to'o 2016 bainhira sofre moras, nune'e hapara provizóriu vokasaun hanesan manorin-na'in, durante moras.
" Ha'u lakohi foti salariu ne'ebé tama iha konta Bankaria pesoál tanba rekoñese katak foti osan estadu nian ne'e presiza servisu duni", Tenik Manorin Luisa.
Manorin ne'e argumenta, Agora sente kondisaun normal ona, hakarak kontinua fila-fali servisu, tanba hanorin la'os de'it profisaun maibé vokasaun ida atu hanorin estudante sira hodi prepara ba futuru Timor-Leste.
Hafoin remata vizita, Diretór Nasionál Rekursu Umanu (DNRH) Sr. João Amaral kontinua distribui sertifikadu rekoñesimentu husi KFP ba Diretór Servisu Edukasaun Munisípal, sertifikadu refere ba manorin sira ne'ebé fila ona ba aman maromak nia kadunan santu no idade reforma no totál provizóriu ba manorin sira ne'ebé idade avansa ona hahú idade 65 too 85 iha Munisípiu Liquiça hamutuk 60. Kompostu husi mane 46 no feto 14.
#MÉDIAME
