Suai, 19 Agostu 2025
Sua Exelénsia Ministra Edukasaun, Dra. Dulce de Jesus Soares, hamutuk ho Veteranu, F-FDTL, Profesór, Estudante no Komunidade sira, selebra tinan osan-mean FALINTIL ba dala-50, ne’ebé liuhusi prosesu funu rezisténsia ne’ebé naruk, halo komandante no membru FALINTIL aten brani, sira barak mak mate hamutuk ho povu. Serimónia ne’e realiza iha Kampu Futebol Ladi, Suai, Munisípiu Covalima.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, bazeia ba faktu históriku sira, ne’ebé nakonu ho espíritu patriótiku sira husi FALINTIL, lori IX Governu nia naran, husu atu ita hotu hakru’uk, fó respeitu no onra boot no kle’an ba lideransa no membru FALINTIL sira hotu, ne’ebé mak dedika no sakrifika ona sira-nia aan hodi ohin loron ita bele goza Timor-Leste ida livre no independente.
“Iha faze defeza soberania estadu nian, ita haree katak ho espíritu no esperiénsia ne’ebé FALINTIL nian iha pasadu, husi forsa guerilla tama ba forsa modernu, hahú hatudu daudaun ona oinsá mak FALINTIL bele no kontinua hatuur-aan, nu’udar forsa ida di’ak iha kualidade no proporsionalidade ba iha nasaun Timor-Leste”, dehan S.E. Ministra Edukasaun.
Governante ne’e hatutan, Estadu kontinua investe iha área defeza hanesan prepara ekipamentu sira, kapasitasaun ba rekursu humanu, kontinuasaun estudu ba ofisiais sira, formasaun, treinamentu konjuntu ho nasaun seluk ho objetivu atu kria no hasa’e kualidade no profesionalidade FALINTIL-FDTL nian.
#MédiaME
