Covalima, 14 fevereiru 2026
Sua Exelénsia Ministra Edukasaun Dra. Dulce de Jesus Soares ho Emaxada Portugal Iha Timor-Leste Sr. Duarte Bué Alves nomós Prezidente Autoridade Munisípal Covalima Sr. Miguel Armada Cardoso hala’o inagurasaun ba edifísiu Eskola Cafe Suai, Munisípiu Covalima.
Iha Diskursu Sua Exelénsia Ministra Edukasaun Dra. Dulce de Jesus Soares hatete, ohin ministériu edukasaun inagura edifísiu eskola Cafe Suai no eskola ida-ne’e sei ba oan sira iha rai suai hodi prepara sira ba futuru rai ida ne’e nian.
“ Komunidade sira atu ajuda kuidadu eskola ida-ne’e tanba lakohi rona ema ka komunidade estraga eskola ne’e maibe ha’u fiar katak sei akontese iha rai doben suai,” S.E. Ministra husu.
Govenante ne’e esplika, fatin ida ne’e maka fatin ba futuru oan sira – nian no sira maka aban bainrua sei lori rai ne’e ba oin, ho ida ne’e husu ba inan-aman sira aprende ko’alia portugés ho oan iha uma.
Iha fatin hanesan, Prezidente Autoridade Munisípal Covalima Sr. Miguel Armada Cardoso akresenta, edukasaun hanesan prosesu ida ne’ebé ema aprende no hatene buat foun tanba ne’e edukasaun la’os deit iha eskola maibé iha moris loro-loron iha familia, sosiedade no esperiénsia sosiál sira seluk.
“ Edukasaun mós prosesu atu fó no simu hanesan abilidade, atitude no valór sira seluk hodi partilla no dezenvolve potensialidade individuál atu bele kontribui ba sosiedade no nasaun ida ne’e,” tenik PAM Covalima.
PAM mós informa, konstrusaun ida ne’e harii liuhusi prosesu naruk no deskuti kle’an tanba ne’e presiza hotu-hotu nia tulun atu kuidadu ba konstrusaun ida-ne’e hodi fó biban ba manorin-na’in sira atu transmite sira nia matenek ba oan sira hodi implementa iha sira-nia moris loro-loron tanba matenek mak hanesan bee matan moris nian.
#EliasdaCosta
#MédiaME
