Covalima, 14 fevereiru 2026
Ministériu Edukasaun liuhusi Sua Exelénsia Ministra Edukasaun Dra. Dulce de Jesus Soares no akompaña husi dirijente Ministériu edukasaun fahe rezultadu ne’ebé alkansa ona no dezafiu sira iha tinan 2025 no divulga planu asaun anuál ba tinan 2026 iha Eskola EBC Lady Munisípiu Covalima.
Iha intervensaun Sua Exelénsia Ministra Edukasaun Dra. Dulce de Jesus Soares hateten, tenke reflete ba dezempeñu 2025 nian, enjerál rezultadu husi ezame nasionál, iha nivel Ensinu Báziku Covalima iha klaran – ho valór média númeru 5 kompara ho munisípiu sira seluk. Maibé rezultadu jerál ba nivel sekundáriu hatudu dezempeñu menus enjerál kompara ho munisípiu sira seluk. Maibé, iha eskola balu ne’ebé hetan rezultadu di’ak loos.
“frakeza iha nivel EB no Sekundáriu tanba mai hosi hun ne’ebé seidauk metin. Hosi estudu kreximentu aprendizajen ne’ebé Ministériu hala’o iha 2025, ne’ebé sukat aprendizajen ne’ebé akontese durante klase 1, eskola 3 hotu ne’ebé tama iha estudu ne’e hosi Covalima hatudu mudansa uitoan iha aprendizajen entre fulan-abril no fulan-novembru, maibé hahú menus no remata ho koñesimentu menus mós”, tenik SE. Ministra
Lider másimu Edukasaun ne’e esplika, Tinan ida-ne’e sei kontinua dezenvolve setór edukasaun nian, no sei fó sai planu ne’e, maibé hakarak destaka atividade hanesan implementasaun ba kurríkulu foun 30 siklu iha 70 anu. Preparasaun halo ona, no sei kontinua fó apoiu no fó formasaun ba manorin sira.
“ Ha’u enkoraja eskola ida-idak atu hala’o kurríkulu foun ne’e ho loloos – keta haluha katak iha sékulu 21 ita tenke fó importánsia boot ba dezenvolvimentu ba estudante nia kompeténsia sira! Ohin livru sira to’o ona iha Ministériu nia liman, no sei konsentra ba empakota lalais hodi bele to’o molok aulas hahú”, SE. Aprofunda.
Atividade ne’ebé importante tebes mak iha tinan 2026 nia rohan sei hala’o teste EGRA/EGMA iha nivel nasionál. Ne’e importante tebes tanba maski ita halo mini-EGRA sira, ita la halo ida ofisiál iha nivel nasionál dezde 2009. Nune’e, eskola sira hotu ho siklu 1 mak tenke FOKA! Ita sei hatene eskola ne’ebé sei tuir teste, nune’e hahú ona ekipa hosi Ministériu, inklui mentór ALMA sira, sei prepara estudante sira hodi halo teste ba estudante sira iha klase 2 no 3.
#EliasdaCosta
#MédiaME
