Díli – Loron Sexta-Feira, 13 Dezembru 2024
Sua Exelénsia Ministra Edukasaun Dra. Dulce de Jesus Soares, hamutuk ho dirijente nasionál no munisipál Ministériu Edukasaun nian, anúnsiu rezultadu Ezame Nasionál tinan letivu 2024 ba públiku, iha Salaun Konferénsia Ministériu Edukasaun, Vila-Verde.
Iha oportunidade ne’e, Sua Exelénsia Ministra Edukasaun Dra. Dulce de Jesus Soares, hateten, ezame nasionál ne'e nu'udar instrumentu avaliasaun sumáriu ida-ne'ebé ho objetivu atu avalia kompeténsia no abilidade ne'ebé dezenvolve husi estudante sira, durante iha sira-nia karreira akadémika no atu komprende nivel kualidade hanorin no aprendizajen, hanesan oportunidade ida ba kresimentu no preparasaun ba futuru.
“Ida ne'e hanesan momentu ida-ne'ebé simboliza kulminasaun ba dedikasaun servisu tomak, hodi prezerva komitmentu husi ema hotu ne'ebé envolve iha prosesu edukasaun no ulukliu, ha'u hakarak kongratula estudante sira hotu ne'ebé ho esforsu no determinasaun tomak maske infrenta dezafiu barak”, dehan S.E. Ministra Edukasaun.
Governante ne’e, hato’o liafuan agradese ba mestre sira, tanba sira-nia papél importante la'ós de'it atu prepara estudante sira ba ezame, maibé liu-liu atu forma sidadaun di'ak, sidadaun krítiku, kriativu sira ne'ebé mak iha kompromisu ba sosiedade.
Governante ne’e hatutan, rezultadu tinan ida-ne'e nian, importante atu hatudu katak rezultadu sira-ne'e reflete esforsu komunidade edukasaun tomak nian. Rezultadu sira hatudu katak estudante barak konsege aas liu espetativa. Rezultadu hirak-ne'e hatudu impaktu pozitivu husi serbisu hamutuk. Kompromisu estudante sira-nian, apoiu família nian no papél esensiál profesór sira nian.
Enkuantu, númeru totál alunu finalista iha tinan letivu 2024, hamutuk na’in 55.661, kompostu husi Ensinu Báziku hamutuk na’in 28.216, Ensinu Sekundáriu Gerál hamutuk na’in 23.661, Ensinu Sekundáriu Tékniku Vokasionál hamutuk na’in 3.733 no Ensinu Rekorrente hamutuk na’in 364.
Husi totál estudante iha leten, estudante Ensinu Báziku ne’ebé la tuir ezame nasionál hamutuk na’in 262, Ensinu Sekundáriu Gerál hamutuk na’in 339, Ensinu Sekundáriu Tékniku Vokasionál hamutuk na’in 51 no Ensinu Rekorrente hamutuk na’in 27.
#MédiaME
