Ermera – loron konta-feira, 22 agustu 2024
Sua Exelénsia Ministra Edukasaun Dra. Dulce de Jesus Soares partisipa iha misa ba loron Na’in Feto Virgen Peregrina Fatubessi, hodi hanoin hikas fali Na’in Feto Virgen Peregrina ne’ebé hadulas territóriu Timor-laran tomak durante iha tempu difisil nia laran.
Iha homília, Amu Selebrante, Pe. Ricardino C. Mendonça, hateten, ohin selebra Na’in Feto Virgen Peregrina nia loron, hanesan inan ida ne’ebé halibur povu Timor iha tempu sira difisil to’o ohin loron hodi senti no simu grasa oin-oin husi nia harohan da’et.
“Iha situasaun hotu-hotu ne’ebé ita halo ho ita-orasaun, intesaun no devosaun ba nia, grasa hirak ne’ebé ita kuran, sei to’o mai ita no to’o ohin loron ita hakarak mai halibur hamutuk nafatin iha fatin ida ne’e hodi agradese ba Maromak hodi hahí no hawelok ba Na’in Feto Peregrina” dehan Amu Selebrante.
Amu selebrante ne’e hatutan, ohin mai halibur iha fatin ida ne’e, tanba hakarak husu Na’in Feto nia harohan da’et ba grasa hirak ne’ebé idak-idak kuran, nune’e bele hetan nafatin tulun, bensaun no protesaun sira husi Maromak no brani hatán ba Maromak nia bolu iha idak-idak nia moris.
#MédiaME
