RAEOA, 14/06/2024
Sua Exelénsia Ministra Edukasaun Dra. Dulce de Jesus Soares ho Sua Exelénsia Embaxadora Boa Vontade ba Asuntu Edukasaun iha Timor-Leste Dra. Kirsty Sword Gusmão hamutuk ho Sekretária Rejionál Edukasaun no Asuntu Sosiál RAEOA Sra. Inácia Tamele no Embaxada Australia liu-husi programa PHD, Banku Mundiál liu-husi programa BEST ho ekipa komivita husi Ministériu Edukasaun, halo lansamentu ba programa Apoiu Lideransa Mentoria no Aprendizajen (ALMA), iha Rejiaun Administrativa Espesiál Oe-cusse Ambeno (RAEOA).
Iha lansamentu programa ALMA ne’e, S.E. Ministra Edukasaun Dra. Dulce de Jesus Soares hateten, iha IX Governu konstituisionál, ita haree katak programa ne’e di’ak tebe-tebes atu ajuda profesór sira-nia dezempeñu nomós estudante sira liu-liu iha prosesu aprendizajen oinsá mak bele ajuda líder eskola atu halo sira-nia kna’ar di’ak liután no ajuda halo observasaun sala aula no jestaun eskolár.
“Ita iha esperansa bo’ot katak, ALMA iha Oe-cusse bele la’o di’ak hodi mellora eskola sira, nomós estudante sira-nia dezempeñu”. Bodik S.E. Ministra Edukasaun.
Aleínde ne’e S.E. Embaxadora Boa Vontade ba Asuntu Edukasaun iha Timor-Leste Dra. Kirsty Sword Gusmão konsidera programa ALMA ligasaun ho métodu numerasia no literasia, tanba programa ne’e nia objetivu prinsipál mak atu halo mudansa, prezisa hadi’a rezultadu aprendizajen ba labarik sira iha aula laran liuhusi apoiu líder eskola.
Iha okaziaun ida ne’e, Sekretária Rejionál Edukasaun no Asuntu Sosiál RAEOA Sra. Inácia Tamele haktuir, nu’udar Timoroan no liu-liu Oe-cusse oan, sente kontente no prontu simu programa ALMA atu implementa iha Oe-cusse.
Iha lansamentu programa ALMA, Ministériu Edukasaun oferese mós tableta ba mentór sira atu fasilita, wainhira halo observasaun iha aula laran. Programa ALMA ne’e rasik hetan apóiu husi orsamentu parseiru Governu Austrália liuhusi Department Of Foreign Affairs and Trade (DFTA) no Partnership Human Development (PDH) nomós husi Banku Mundiál liuhusi projetu Basic Education Strengthening Trasfomation (BEST).
#MédiaME
