Ainaro - Loron, Sexta-Feira, 21 juñu 2024
Sua Exelénsia Ministra Edukasaun Dra. Dulce de Jesus Soares inagura moru protesaun ba Eskola Ensinu Sekundáriu Katólika Santa Maria Ainaro ne’ebé hetan apoiu husi The Damascus College Australia hodi proteje animál tama arbiru iha resintu eskola nian hodi estraga ai-funan no ai-horis sira ne’ebé kuda iha eskola.
Iha entrevista Sua Exelénsia Ministra Edukasaun Dra. Dulce de Jesus Soares hateten, agradese ba Damascus College husi Australia ne’ebé apoiu ona eskola ida ne’e hosi halo moru protesaun, tanba karaik la iha eskola ida ne’e animál mós tama hodi estraga ai-horis sira ne’ebé estudante sira kuda iha resintu eskolár.
“Ita hakarak Amu sira kontinua fó apoiu ba joven sira, tanba oras ne’e dadaun joven sira hasoru problema barak iha sira-nia moris, tanba ne’e ita fiar katak liuhusi Eskola Sekundáriu Katólika Santa Maria Ainaro, joven sira bele sai feto klosan no mane klosan ne’ebé mak di’ak, nune’e bele sai futuru di’ak ba igreija nomós futuru ba nasaun ida ne’e”, dehan S.E. Ministra Edukasuan.
Governante ne’e hatutan, estudante sira-nia servisu importante mak estuda, tanba ne’e joven sira aproveita oportunidade ne’e hodi estuda, la’os de’it sai ema matenek, maibé iha mós étika morál atu bele sai sidadaun di’ak iha futuru.
Antes halo inaugurasaun ba moru protesaun iha Eskola Sekundária Katólika Santa Maria Ainaro, Sua Exelénsia Ministra Edukasuan Dra. Dulce de Jesus partisipa uluk misa ba loron Santu Luís Gonzaga nian iha Parókia Nossa Senhora de Fátima Ainaro.
#MédiaME
