Manufahi, Tersa-Feira 04 Juñu 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hamutuk ho Prezidente Komisaun Funsaun Públika Sr. Agostinho Letêncio de Deus no dirijente sira husi Ministériu Edukasaun nian fó pose ba manorin na’in hamutuk na’in 312 ba ingresu espesiál no rejime karreira dosente iha Munisípiu Manufahi.
Iha diskursu Sua Exelénsia Ministra Edukasaun Dra. Dulce de Jesus Soares hateten, Profesór mak siéntista, nia avalia alunu nia progresu no kria ipóteze hodi koko uza método ne’ebé ajuda hodi lori alunu sira atu atinji sira-nia potensiál tomak.
“Ita hotu bele konkorda katak vokasaun profesór nian maka importante duni iha ita-nia sosiedade no nasaun ida-idak iha Mundu, tanba profesór laiha oinsá ita bele avansa dezenvolve no evolui? loos duni edukadór mak sistema edukasaun nia fuan”, Tenik Ministra Edukasaun.
Iha oportunidade ne’e Sua Exelénsia Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos salienta, nu’udar funsionáriu públiku, papél no dever maka servisu, eduka no hanorin oan sira, tanba atu transforma Manufahi ba di'ak, fundasaun mak edukasaun.
Aleínde ne’e Prezidente Komisaun Funsaun Públika Sr. Agostinho Letêncio de Deus esklarese, lori Komisaun Funsaun Públika nia naran, sei apóiu tomak ba desizaun hotu ne’ebé mak halo iha Ministériu Edukasaun.
Iha serimónia ne’e hetan partisipa husi Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hamutuk ho Prezidente Komisaun Funsaun Públika Sr. Agostinho Letêncio de Deus ho dirijente sira husi Ministériu Edukasaun, Presidente Autoridade Munisípiu Manufahi, Komandante F-FDTL Postu Naval Betano, Komandante PNTL Munisípiu Manufahi, Prezidente konsellu Veteranu Munisípiu Manufahi, Prezidente KRAM nomós família sira.
#jornalistaclarinopacheco
#MédiaME
