Ermera - Sabado, 01/06/2024
Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos partisipa iha selebrasaun loron Mundiál ba Labarik iha Postu Administrativu Railaco-Craik Munsípiu Ermera, Sabado ne’e.
Iha Diskursu Country Diretór Mary MacKillop Today Sr. Alipio Baltazar informa, Objetivu husi loron mundial labarik ne'e atu promove no valoriza labarik sira nia direitu no dever ba moris di'ak no atu hasa'e manorin, estudante no reprezentante Asosiasaun Pais e Profesores, komunidade ka inan-aman sira-nia konsiénsia hodi fö importánsia ba labarik sira nia direitu no devér iha sira-nia moris loro-loron.
" Ita nia konsiénsia seida'uk makas dala barak ita Explora Labarik sira nia direitu atu halimar, eskola no mós sira nia direitu atu moris di'ak, ha'u espera katak ho selebrasaun ida ne'e bele kura ona ita nia konsiénsia protesaun ita oan sira nia futuru", katak Country Diretór ne'e.
Fatin hanesan, Exelénsia Sekretáriu Estadu ESJESTV Domingos Lopes Lemos hateten, papél inan aman nian mak labele intervén fali labarik nia atividade loroloron, ohin loron eventu ida ne’ebé mak bo’ot tebes, Mecyclop ho Ministériu Edukasaun realiza serimónia ida ba loron Mundiál Labarik nian ba hotu-hotu atu hotu-hotu halo reflesaun ida katak papél labarik ki’ik oan sira ne’e importante tebes-tebes fó ba labarik sira atu dezenvolve talentu, matenek ne’ebé iha atu nune’e bele promove ka projeta ba futuru.
"Labarik sira iha direitu ba moris, direitu ba edukasaun, direitu ba protesaun, labarik sira iha direitu ba partisipasaun, buat haat ne’ebé mak sai tema ne’ebé mak ohin Ministériu Edukasaun ka’er atu bele habelar ba inan-aman sira.
Governante ne’e mós enkoraja manorin-na’in sira katak, profesór sira iha meiu no jestu barak atu uza hodi eduka labarik ki’ik oan sira, eduka sira ho maneira, morál ne’ebé mak di’ak nu’udár edukadór. Tanba ne’e husu ba hotu-hotu, ohin loron 1 fula Juñu loron labarik sira nian, hotu-hotu halo reflesaun kona-ba saida mak atu halo papél manorin nian no inan-aman nian ba ita-nia oan sira.
"Ita-nia Nasaun ne’e nasaun ne’ebé foun, foin ukun-an tinan rua-nulu-resin, presiza rekursu umanu ne’ebé di’ak atu ka’er rai ida ne’e iha tinan sanulu ka rua-nulu oin mai, karik agora ita lakohi eduka sira ho di’ak, lakohi lori sira ba dalan ne’ebé mak loos, tinan sanulu mai tan ita sei basa rentos, mai ita festeza loron ida ohin ho hakmatek paz nia laran atu nune'e ita lori oan sira ba futuru ne'ebé nabilan tuir ita idak-idak nia hakarak", deklara Exelénsia Sekretáriu Estadu ESJESTV.
Enkuantu atividade loron Mundiál Labarik ne'e organiza husi parseria Mary MacKillop Today (MMT), ho tema Família mak investe ba interese di'ak labarik nian, implementa iha eskola Ensinu Báziku Filial Railaco-Craik, Pre-Eskolár Sobrequeque no Pre-Eskolár Riamori inklui mós partisipasaun manorin sira, komunidade, inan-aman, reprezentante Asosiasaun Pais e Profesores (APP) hosi eskola refere.
#jornalistarita
#MédiaME
