Dili - Loron Sexta-feira, 21 Marsu 2025
Sua Exelénsia Ministra Edukasaun, Dra. Dulce de Jesus Soares, hasoru malu ho Sekretáriu Estadu husi Nasaun Kambódia hodi diskuti kona-ba kooperasaun entre nasaun rua iha setór edukasaun dijitál no teknolojia informasaun, hodi foku ba transformasaun diploma eskolár ne'ebé envolve dijitalizasaun hanesan uza kódigu QR (QR code).
Durante reuniaun, parte rua diskute estratejia atu integra teknolojia, informasaun no komunikasaun (TIK) iha sistema edukativu, ho foku ba transformasaun, relasiona ho diploma eskolár ne’ebé envolve dijitalizasaun hanesan uza kódigu QR (QR code), hodi garantia seguransa, poupa orsamentu, tempu no enérjia.
Sua Exelénsia Ministra Edukasaun, destaka importánsia husi transformasaun dijitál hanesan feramenta atu garante edukasaun ida-ne’ebé inkluziva no iha kualidade.
"Kolaborasaun internasionál ne’e fundamentál atu aselera asesu ne’ebé ekuitativu ba teknolojia foun, liuliu iha preparasaun Timor-Leste nian atu sai hanesan membru ASEAN”, dehan S.E. ME.
Iha sorin seluk, Sekretáriu Estadu husi Kambódia hato’o interese ninia nasaun nian atu fahe esperiénsia no prátika di’ak sira, hodi subliña papél teknolojia hanesan meiu ba dezenvolvimentu edukasaun no sosiál.
Liuhusi reuniaun ne’e hametin liután relasaun entre nasaun rua nian ho énfaze ba edukasaun, inovasaun no transformasaun dijitál.
#MédiaME
