Ermera, 19/08/2024
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Vise-Ministru Komérsiu Industria Dr. Augostu Junior Trindade no Prezidente Autoridade Munisípiu Ermera Sr. José Martinho dos Santos Soares ho Padre Vigáriu Forraniu Vigararia Ermera Pe. Ricardino C. Mendonça, hala’o enkontru daruak ho dirijente sira servisu munisípiu nian inklui autoridade relijiozu sira, hodi ko’alia kona-ba preparasaun sarani Vigararia Ermera nian, atu mai partisipa iha misa Sua Santidade Papa Francisco nian iha Tasitolu Díli no mós distribui kaus ho kartaun ba komisaun organizadora sira husi Munisípiu ermera.
Iha enkotru ne’e Sua Exelénsia Ministra Edukasaun Dra. Dulce de Jesus Soares hateten, governu ho igreja responsabiliza duni, atu garante sarani sira bele mai partisipa másimu iha misa Sua Santidade Papa Francisco nian iha Tasitolu Díli.
“Ha’u hanoin saida mak ita bele halo agora dau-daun ne’e maka, esforsu oan ida atu bele garante sarani sira hotu husi Vigararia Ermera to’o iha tasitolu, ida ne’e mak importante”. Tenik Ministra Edukasaun
Iha fatin hanesan, Vise-Ministru Komérsiu Industria Dr. Augostu Junior Trindade, akresenta, iha biban ida ne’e, prezisa konsolida forsa hamutuk liu-liu parókia sira, autoridade postu sira, PNTL sira, atu bele organiza, la’o ho disiplina no la’o ho di’ak.
Alíende ne’e Pároku Parókia Letefoho Pe. Elio Pereira Fernandes esklarese, enkontru ida ohin ne’e importante teb-tebes tanba bele hola desizaun ba iha mobilizasaun husi Munisípiu Ermera ba to’o iha Díli hodi partisipa iha missa Papa Francisco nian.
Hafoin remata enkontru Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Vise-Ministru Komérsiu Industria Dr. Augostu Junior Trindade no Prezidente Autoridade Munisípiu Ermera Sr. José Martinho dos Santos Soares ho Padre Vigáriu Forraniu Vigararia Ermera Pe. Ricardino C. Mendonça distribui mós kaus ho kartaun ba komisaun organizadora sira husi Munisípiu Ermera.
#Média ME
