Ermera – Tersa-Feira, 25 Juñu 2024
Sua Exelénsia Prezidente Repúblika Dr. José Ramos-Horta akompaña husi Sua Exelénsia Ministra Edukasaun Dra. Dulce de Jesus Soares, Vise Ministru Administrasaun Estatal Sr. Jacinto Rigoberto no Xefe Casa Civil Prezidénsia Repúblika nian, Sra. Jesuina Gomes, hala’o vizita ba Ensinu Sekundáriu Tékniku Vokasionál Mota Bandeira Atsabe hodi haree kondisaun eskola no fahe ai-han nesesidade báziku ba komunidade sira.
Iha diskursu, Prezidente Repúblika Dr. José Ramos-Horta hateten, kona-ba setór edukasaun ita tau konfiansa ba Ministra Edukasaun hodi neneik sei rezolve setór ida importante tebe-tebes.
“Tau osan di’ak liu ba edukasaun, maibé mestri sira mós tenki halo formasaun atu bele hanorin didi’ak estudante sira no hatudu disiplina, tanba ne’e mestri sira mós tenki lee beibeik, maske iha dezafiu bo’ot, maibé hau konfia Ministra edukasaun, iha nia mandatu tinan lima ne’e la rezolve 100%, maibé sei buka rezolve”, dehan Xefe Estadu.
Hafoin remata distribuisaun ai-han ba komunidade sira, Sua Exelénsia Ministra Edukasaun Dra. Dulce de Jesus Soares, hala’o vizita mós ba sala aula idak-idak inklui biblioteka hodi haree direta livru sira ne’ebé iha no haruka manorin sira atu fahe ba estudante sira atu bele estuda no autoriza sira lori ba uma hodi bele akompaña mós husi inan-aman sira.
#MédiaME
