Díli – Loron, Sexta-Feira, 20 Dezembru 2024
Sua Exelénsia Ministra Edukasaun Dra. Dulce de Jesus Soares hamutuk Sua Exelénsia Primeiru Ministru RDTL Kay Rala Xanana Gusmão no Sua Exelénsia Sekretáriu Estadu Igualidade Elvina de Sousa Carvalho, halo lansamentu ofisiál ba uniforme eskola nasionál ba utilizasaun iha estabelesimentu edukasaun públika hotu-hotu.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, farda sira mós promove sentidu unidade no pertensa ba eskola, ne’ebé bele enkoraja estudante sira atu envolve an ho barak liután, harii relasaun amizade metin entre sira, no hasa’e sira-nia espíritu eskola nian.
“Farda sira ne’ebé iha hamutuk oin haat (4), konforme tuir nível eskolaridade, hanesan Edukasaun Pré-Eskolár kalsa badak kór matak no mutin, Ensinu Báziku saia no kalsa badak kór xokolate no kamiza mutin, ESG saia-kalsa no kalsa naruk kór azúl no kamiza mutin, ESTV saia-kalsa no kalsa naruk kór metan no kamiza verde nakukun/militar”, dehan S.E. Ministra Edukasaun.
Governante ne’e hatutan, Ministériu Edukasaun tenta hili kór ne’ebé fásil atu sosa iha rai laran ka fasil atu hetan iha loja fa’an roupa ka iha obralan. No mós tetu ba eskola iha área remota sira ne’ebé ho kondisaun mínimu, oan sira sei la’o dook husi uma ba eskola, entaun hili kór sira ne’ebe mak Inan ka Aman sira bele fase lalais.
Ba feto-oan sira, ita mós introdús saia-kalsa atu seguru liu ba sira wainhira sira halimar, haksoit, halai, hakat mota, sira sei sente avontade ka la impede sira atu halo esforsu hanesan ho mane oan sira.
Iha fatin hanesan Sua Exelénsia Primeiru Ministru RDTL Kay Rala Xanana Gusmão, hateten, hanoin did’ak ba, tanba iha loron 07 fulan janeiru 2025 hahú ona ensinu aprendizajen, tanba ne’e tenki garante to’o loron ne’e labarik sira bele hetan hotu ona farda sira ne’e atu bele uza ba eskola.
“Ha’u lahatene, karik ema na’in lima iha família ida ba mak eskola, família balun kbiit laek, depois iha oan na’in lima ne’e susar oituan”, dehan S.E. PM.
Aleinde ne’e, Sua Exelénsia Sekretáriu Estadu Igualidade Elvina de Sousa Carvalho, hateten, halo lansamentu ba uniforma nasionál ne’e, la’os foin agora, maibé tenta dalabarak no ohin foin iha lansamentu ofisiál ba uniforme nasionál,
“Parte interesante husi uniforme nasionál ne’e, ami Sekretáriu Estadu Igualidade hakarak apresia, tanba aleinde iha saia, iha mós saia kalsa no mós fó opsaun ba estudante sira atu hakarak hili kalsa ka saia, tanba iha kazu balun ne’e akontese, bainhira ba eskola, halimar, bainhira uza saia sira la fleksivel, la seguru husi sira-nia kolega sira”, dehan S.E. SEI.
#MédiaME
