Maliana – Loron Sábadu, 21 Dezembru 2024
Sua Exelénsia Ministra Edukasaun Dra. Dulce de Jesus Soares ensera programa intensivu iha Postu Administrativu Maliana. objetivu husi programa intensivu ne’e atu ajuda prepara sira oinsá bele koñese letra, númeru, pinta, hanorin sira hader sedu, hatene komprimenta ema no seluk tán, nune’e tama iha edukasaun pré-eskolár hatene ona buat ruma antes ba ensinu báziku.
Iha serimónia ne’e, Sua Exelénsia Ministra Edukasaun Dra. Dulce de Jesus Soares, hateten, agradese ba apa, ama, avó, tia sira hotu ne’ebé mak fó apoiu tomak ba oan sira hodi hahú mai aprende to’o ohin bele finaliza, tanba la fasil ba ita atu muda sira hodi bele no halo tuir buat ne’ebé inan aman hateten, tanba ne’e presiza ema pasiénsia.
“Atu hanorin pré-eskolár presiza ema matenek no pasiénsia, la’os ema hotu-hotu bele hanorin, tanba tenki haree nia, oinsá mak nia bele hakmatek, nia bele rona, nia bele iha atensaun, nia bele komunika bainhira presiza buat ruma, tanba ne’e profesór no profesora sira tenki sai mós inan ba labarik sira, atu labarik ne’e senti buat ruma bele ko’alia sai”. Dehan S.E. Ministra Edukasaun.
Governante ne’e hatutan, karik tinan oin autoridade suku sira relata katak iha fali labarik sira atu tuir, favór ida lori oan sira ba tuir programa ne’e, tanba tuir dadus ne’ebé iha, foufoun rejistu ema barak, maibé programa la’o to’o klaran labarik sira barak mak la mai partisipa to’o rohan.
Programa intensivu ne’e la’o durante semana sanulu resin lima (15) nia laran, no kada loron estudante sira aprende oras haat (4) nia laran.
#MédiaME
