Díli - loron Sexta-feira, 09 agustu 2024
Sua Exelénsia Ministra Edukasaun Dra. Dulce de Jesus Soares halo audiénsia ho Asosiaun Arte no Aprende ne’ebé kompostu husi ekipa banda "The Kraken", hodi ko’alia kona-ba promosaun lian ofisiál Tetun no Portugés liuhusi Múzika, iha Salaun VIP Ministériu Edukasaun, Vila-Verde.
Iha enkontru ne'e, Manajer The Kraken, Natalino Fernandes Ximenes informa, objetivu prinsipál husi audiénsia ne'e, mak aprezenta konseitu ruma kona-ba múzika liga ba promosaun lian ofisiál Tétun no Portugés liuhusi Múzika.
"Planu hirak ne'ebé iha, atu halo múzika kona-ba Siénsia Naturais ho Siénsia Sosiais ne’ebé mak sei integra mós iha kurríkulu Ministériu Edukasaun nian, hodi bele ajuda estudante sira kona-ba oinsá mak bele aprende liuhusi múzika", dehan Manajer The Kraken.
Iha ekontru ne’e mós halo konseitu balun hanesan setór kulturál hodi integra mós programa edukasaun nian, konstroi Biblioteka fiksu ida iha fatin públiku sira hanesan jardim, atu sai espasu ba estudante sira hodi bele asesu ba lee livru no tuir formasaun sira ne’ebé mak bele eleva sira-nia koñesimentu.
#MédiaME
