Dili – Loron Kinta-feira, 06 Marsu 2025
Sua Exelénsia Ministra Edukasaun Dra. Dulce de Jesus Soares, halo abertura ofisiál ba kolókiu validasaun revizaun konjunta planu setór edukasaun tinan 2020-2024, hodi bele hetan fali informasaun foun hodi dezenvolve planu setór edukasaun ba tinan 2026-2030. Kolókiu ne’e realiza iha Salaun City 8, Manleuana.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, ohin Ministériu Edukasaun hamutuk ho parseiru dezenvolvimentu nasionál no internasionál, realiza kolókiu ida hodi halo halo revizaun ba planu setór edukasaun tinan 2020-2024.
“Revizaun ne’e tuir lolos hala’o iha tinan 2020, maibé ho situasaun Covid, tanba ne’e iha tinan ne’e foin halo revizaun ba servisu hotu ne’ebé halo tiha ona no rezultadu husi revizaun ne’e bele fó fali informasaun atu bele dezenvolve planu setór edukasaun ba tinan 2026-2030”, dehan S.E. Ministra.
Governante ne’e hatutan, susesu sira iha tinan 2020 mai leten mak halo tán sala aula foun, formasaun ba profesór sira, profesór 4 mil resin foin lalais tama ona ba ingresu espesiál no iha duni problema oituan kona-ba dezempeñu estudante sira nia, maibé tinan-tinan kontinua hadi’a liuhusi revizaun kurríkulu, formasaun ba profesór sira no mós fornese livru atu bele apoiu liután prosesu aprendizajen iha eskola sira.
Iha fatin hanesan, Reprezentante UNICEF, Ainhoa Jaureguibeilia, hateten, iha kolókiu ne’e, UNICEF apoiu Ministériu Edukasaun atu oinsá atu lori hamutuk parseiru interesante husi nasionál no internasionál sira ne’ebé mak servisu iha área edukasaun hodi avalia progresu no dezafiu servisu Ministériu Edukasaun husi tinan 2020-2024.
#MédiaME
