Liquiça, 19-07-2024
Sua Exelénsia Ministru Edukasaun Interinu Sr. Domingos Lopes Lemos, hala’o vizita ba Edifisiu Eskola Sekundariu Tékniku Vokasionál Lissadila, iha Munisípiu Liquica, sesta-feira semana kotuk.
Iha entrevista Sua Exelénsia Ministru Edukasaun Interinu Sr. Domingos Lopes Lemos hateten, objetivu husi vizita ne’e atu observa kondisaun eskola refere hodi haree, karik posibilidade tinan oin atu bele halo netik buat ruma iha edifísiu ne’ebé dadaun ne’e abandona hela.
“Ita fó hanoin ba Autoridade lokál katak sosializasaun ba komunidade ne’e importante atu nune’e komunidade bairu ne’ebé iha Postu Administrativu ne’e nia-laran, tanba ne’e maka posibilidade tinan oin bele loke eskola refere”, dehan Ministru Edukasaun Interinu.
Fatin hanesan Xefe Suku Lissadila, Fernando Lobo esplika, iha tinan 2017 Sua exelénsia Ministra sei sai hanesan Vise Ministra husu fatin mamuk iha Lissadila atu nune’e bele loke Eskola Tékniku Vokasionál ida, tanba ne’e lori kedas Sua Exelénsia mai haree fatin ne’e. Eskola ne’e nia obra hahú iha tinan 2019 no remata iha 2021.
“Nafatin ezije ba IX (Nonu) Governu liu husi Ministériu Edukasaun katak tinan 2025 bele loke eskola ne’e, tanba estudante sira hein hela aula de aprendijajem. Eskola ne’e inklui Suku Gisu, parte husi Ermera sorin Asulau, parte husi Liquiça sorin Faulara nian, Lissadila no Maubaralissa ne’e mak hanesan sentru ida ba suku hirak ne’e”, dehan Lider komunitariu ne’e.
Sua Exelénsia Ministru Edukasaun Interinu Sr. Domingos Lopes Lemos hala’o vizita ba edifisiu refere akompaña husi Diretór Nasionál Ensinu Sekundáriu Jerál Sr. Benjamin F. da Cruz no dirijente sira seluk husi Ministériu Edukasaun nian, edifisiu refere kompostu husi aula neen(6).
#jornalistamario
#MédiaME
