Liquiçá, 24 Jullu 2026 – Instituto Nacional de Formação de Docentes e Profissionais da Educação - INFORDEPE, ofisialmente termina ona formasaun faze dahuluk kona-ba implementasaun reforma kuríkulu ba profesór klase 8 iha Munisípiu Liquiçá.

Formasaun durante loron 3 ne'e hala'o iha Eskola Ensinu Sekundáriu Katólika São João de Brito, Liquiçá, hahú husi loron 22 to'o 24 Jullu 2026. Atividade ne'e hetan partisipasaun husi profesór sira husi eskola oin-oin iha munisípiu Liquiçá no mós husi Inspetór Edukasaun munisípiu nian.

Iha formasaun ne'e, formadór sira husi INFORDEPE fahe matéria importante 4:
1. *Mudansa iha Kuríkulu Foun* ba klase 8
2. *Metodolojia Hanorin* ne’ebé sentra ba estudante
3. *Oinsá halo Planu Lisaun* ne'ebé efetivu
4. *Téknika Avaliasaun* foun atu sukat kompeténsia estudante sira

Objetivu prinsipál mak atu prepara profesór sira hodi implementa didi'ak kuríkulu foun iha tinan letivu oin mai.

Iha serimónia terminasaun, Superintendente Munisípiu Manufahi, *Sr. Rodolfo da Conceição*, fó apresiu ba dedikasaun formadór no formandu sira.

“Imi iha responsabilidade boot atu suporta Ministériu Edukasaun nia intensaun. Ita tenke prepara ita nia jerasaun foun atu adapta ba dezafiu iha sékulu XXI,” dehan nia.

Reprezentante formandu, *Sr. Talsizio Francisco Salsinha Soares*, mós hato’o agradesimentu no promete sei fahe fali koñesimentu ne'e ba kolega no estudante sira.

“Ami nia esperansa mak estudante sira sei iha koñesimentu forte no bele kompete iha nível nasionál no internasionál,” afirma nia.

Hafoin formasaun ida-ne'e, formandu sira sei fila ba sira nia eskola hodi fahe fali ba profesór sira seluk.

Media ME
Justino Neno
Quefi