Dili – Loron Segunda-feira, 07 Abril 2025

Eskola Sekundáriu Gerál 4 Setembru UNAMET, Balide, Dili, realiza ezame primeiru períodu iha loron dahuluk la’o ho di’ak, tanba profesór no estudante sira iha eskola refere kumpri oráriu ne’ebé mak determina tuir kalendáriu ezame nian.

Tuir ámbitu ezame eskola nian, Diretór Eskola ESG 4 Setembru UNAMET, Sr. Sérgio A. da Cruz, hateten, ezame ba loron ohin nian ba primeiru períodu 2025 nian la’o ho di’ak, tanba profesór no alunu sira kumpri sira-nia oráriu ne’ebé maka eskola fó no profesór sira mós hala’o sira-nia knár hanesan vijilánsia iha turma laran la’o ho di’ak tebes.

“Sala-aula ne’ebé maka estudante sira uza hodi tuir ezame ne’e di’ak ho fasilidade kompletu hanesan kadeira no meza. Nune’e labarik hotu tuur ho di’ak, hakmatek no konfortável hodi partisipa iha ezame”, dehan Diretór, bainhira hetan vizita husi ekipa Ministériu Edukasaun.

Observasaun jerál husi ekipa Ministériu Edukasaun kona-ba ezame primeiru períodu ba loron dahuluk ne’e la’o di’ak, tanba mantein situasaun hakmatek no estudante sira mós partisipa ezame ho di’ak no máximu tebes.

#MédiaMGRPP-ME