Díli, 12 Agostu 2025 – Ekipa Comissão Nacional Juventude Católica Timor Leste(CNJCTL), hala'o enkontru ho Sua Exelénsia Ministra Edukasaun, Dra. Dulce de Jesus Soares, hodi ko’alia kona-ba programa ajustamentu vizita Kruz Joven Internasionál, ne’ebé sei mai iha Timor-Leste iha loron 23 fulan agostu tinan ne’e no jornada nasionál juventude iha parókia Bobonaru. enkontru ne’e realiza iha Sala VIP Ministériu Edukasaun, Vila-Verde.
Iha enkontru ne’e, Prezidente Exekutivu CNJCTL, Pe. Francisco Indra do Nascimento Tey Seran, husu Ministériu Edukasaun, atu organiza estudante sira, liuliu atu fó benvindo ba Kruz Joven husi Aeroportu, mai to’o Katedral, iha loron 23 fulan agostu tinan ne’e, iha tuku 13:00 meiudia, tuir oráriu aviaun Aero Dili nian.
“Kruz Joven Internasionál ne’e sei hela kalan rua iha Katedral, hafoin iha loron 25 sei viajen ba Maliana, no toba kalan ida iha Katedral Maliana, hafoin liu ba Bobonaru iha loron 26 no sei iha misa enseramentu iha loron 29, hafoin filafali mai iha Katedral Dili”, dehan Prezidente Exekutivu CNJCTL.
Prezidente Exekutivu CNJCTL ne’e hatutan, Ekipa komisaun organizadora hato’o ona pedidu mai iha Ministériu Edukasaun, atu apoiu tenda ba parókia Bobonaru, hodi apoiu joven sira ne’ebé mak ba iha ne’ebá. Husu mós apoiu transporte, atu bele transporta sarani sira ne’ebé sei mai husi Dioseze Baucau inklui Dioseze Dili atu bele ba iha Bobonaru, transporte ne’e sei apoiu husi loron 25 hodi tula sarani sira husi Dili ba Bobonaru no loron 29 filafali husi Bobonaru.
#MédiaME
