Bobonaru – Loron Sexta-Feira, 14 Marsu 2025
Sua Exelénsia Ministra Edukasaun, Dra. Dulce de Jesus Soares, hamutuk ho Sua Exelénsia Ministra Saúde, Dra. Élia dos Reis Amaral, PAM Bobonaru, Sr. Alexandrino Pires, Adidu Embaixada Korea ba Timor-Leste, Sra. Park Sungheui, Reprezentante WFP iha Timor-Leste, Sra. Jacqueline de Groot, Reprezentante KOICA iha Timor-Leste, Sra. Youn Hwa Kang, Profesór no Estudante sira hotu, inagura dapur eskolár no lansamentu merenda eskolár, iha Eskola EBC Atabae, Munisípiu Bobonaru.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, ema hotu haree katak estudante sira komprometidu atu mantein dapur di’ak no fó kuidadu ho di’ak. Nune’e, husu edukadór sira iha ne’e, no mós inan-aman sira, atu tau matan ba dapur ne’e no serbisu hamutuk, atu halo Atabae sai fatin saudavel, labarik sira bele han ho di’ak no nutritivu.
“Ba Governu Korea nian, ba WFP, ba parseiru sira hotu, no ba munisípiu, ha’u-nia agradesementu dala ida tan. Ho suporta hosi Ita-Boot sira hotu Ministériu sente forte liután. Programa ‘Say No to 5S’ ajuda Ministériu iha maneira barak, la’ós de’it ho dapur, maibé hodi halo rastreiu ba labarik sira atu bele identifika moras no fó tratamentu ba sira’, dehan S.E. ME.
Governante ne’e akresenta, tuir loloos agora merenda eskolár mak programa ne’ebé organiza hosi Munisípiu ida-idak, maibé nafatin mós prioridade Ministériu Edukasaun nian, tanba envolve eskola sira no liuliu afeta estudante sira no sira-nia aprendizajen. Nune’e, sempre envolve hodi tau matan ba programa ne’e no asegura katak hatán ba estudante sira-nia nesesidade.
Iha fatin hanesan, Sua Exelénsia Ministra Saúde, Dra. Élia António de Araújo dos Reis Amaral, hateten, momentu ne’e reprezenta pasu importante husi kompromisu konjunta, atu asegura katak labarik sira bele asesu ba edukasaun no asesu ba alimentasaun ne’ebé adekuadu hodi bele apoiu no dezenvolve kapasidade ho di’ak, nune’e bele simu lisaun mós ho di’ak.
“Dapur eskolár ne’ebé liga ho programa merenda eskolár, sai nu’udar kondisaun importante hodi komprimenta inisiativa nutrisaun, nu’udar pilár xave ben-estar infantil hodi hadi’a dezempaña eskolár no hametin futuru ida ne’ebé saudavél liután hodi kontribui ba governu kompromisu atu promove ai-han seguru no saudavél iha rai doben Timor-Leste”, dehan S.E. MS.
Aleinde ne’e, Reprezentante WFP iha Timor-Leste, Sra. Jacqueline de Groot, hateten, onra no previléziu tebes hodi hamutuk iha ne’e, hanesan okaziaun ne’ebé signifikante tebes atu selebra inagurasaun ba dapur foun iha eskola EBC Atabae, Bobonaru, hanesan esforsu koletivu ida hodi hametin liután programa merenda eskolár.
“Inisiativa ida ne’e hanesan ita foti hanesan parte ida husi projetu konzuntu ne’ebé halai ba 5S ne’ebé iha signifikadu katak, dehan lae ba hamlaha, dehan lae ba bebida midar/hemu tua, dehan lae ba fuma, dehan lae ba lumbringa hada’et husi rai no dehan lae ba infesaun kulit, tanba ne’e hadi’a implementasaun merenda eskolár no ambiente mak ami-nia komitmentu hodi enderesu ba dezafiu sira, dehan Reprezentante WFP iha Timor-Leste.
Nia akresenta, dapur ida ne’e la’os de’it estrutura fíziku, maibé hanesan rekursu vitál ida ne’ebé garante ba labarik sira hodi garante ba asesu ai-han ne’ebé mak nutritivu, ai-han ne’ebé mak produs lokalmente ne’ebé prepara husi kozineira sira ho maneira no ekipamentu ne’ebé seguru, tanba nutrisaun sai hanesan esensiál ba labarik sira-nia saúde, ba dezenvolvimentu kognetivu no mós iha kapasidade hodi atinji sira-nia potensiál.
Antes halo inagurasaun ba dapur eskolár, Sua Exelénsia Ministra Edukasaun, Dra. Dulce de Jesus Soares, hala’o vizita ba sala aula no biblioteka Eskola EBC Atabae nian no orienta profesór sira hodi fahe livru ba estudante sira atu lori ba uma, nune’e sira mós bele prepara-an iha uma antes mai partisipa prosesu aprendizajen iha eskola.
#MédiaME
