Díli, 14 Agostu 2025 — Sua Exelénsia Ministra Edukasaun, Dra. Dulce de Jesus Soares, partisipasaun iha abertura ba Programa Parlamentu Juveníl, ne’ebé hala’o iha Parlamentu Nasionál, ho partisipasaun husi joven estudante sira ne’ebé eskolla ona husi munisípiu hotu iha Timor-Leste.
Iha entrevista Sua Exelénsia Ministra Edukasaun, Dra. Dulce de Jesus Soares, hateten, ohin partisipa iha abertura ba programa Parlamentu Juveníl, ne’ebé mak dadaun ne’e sai ona programa iha iha Parlamentu Nasionál, ne’ebé mak partisipa husi joven sira husi Munisípiu hotu iha Timor-Laran tomak ne’ebé eskolla ona.
“Programa ne’e hanesan tipu teste ida, atu haree estudante sira-nia kapasidade no koñesimentu iha asuntu jerál sira, liuliu kona-ba Dezafiu no Avansu Língua Portugeza iha nasaun Timor-Leste, tanba ne’e ita hakarak rona joven sira atu bele espresa sira-nia hanoin iha debate ida ne’e, nune’e husi informasaun hirak ne’e Ministériu Edukasaun haree atu oinsá bele hadi’a liután prosesu aprendizajen”, dehan S.E. Ministra Edukasaun.
Governante ne’e hatutan, Ministériu Edukasaun nia papél atu haree ba asuntu akadémiku, maibé presiza tebetebes públiku tomak nia apoiu, nune’e Língua Portugeza bele sai mós hanesan língua ida iha moris loroloron nian.
Husu ba estudante sira, atu aproveita oportunidade ne’e hodi espresa opiniaun durante loron 3 iha Parlamentu Nasionál, ne’e hanesan oportunidade ba sira atu bele aprende ho di’ak liután no labele haree Língua Portugeza hanesan matéria ida ne’ebé mak aprende de’it iha eskola, maibé bele uza iha moris loroloron hodi reforsa liután prosesu aprendizajen iha futuru.
#MédiaME
