Bobonaru, 06 Agostu 2025 – Sua Exelénsia Ministra Edukasaun, Dra. Dulce de Jesus Soares, hamutuk ho parseiru sira husi Spend it Well, inagura edifísiu eskola Ensinu Báziku Filiál (EBF) Builecon, ne’ebé kompostu husi sala aula 4, iha Postu Administrativu Balibó, Munisípiu Bobonaru.
Iha Diskursu, Sua Exelénsia Ministra Edukasaun, Dra. Dulce de Jesus Soares, hateten, eskola ida-ne’e, hanesan sira seluk ne’ebé Spend it Well harii, mak oin-seluk uitoan hosi eskola sira seluk. Spend it Well sempre halo melloria ki’ikoan ruma bainhira sira halo konstrusaun. Iha kazu ida-ne’e, sira halo sala 4 hamutuk ho dapur, to’os eskolár, sentina 5. Komponente sira-ne’e permite eskola atu hala’o kurríkulu ho loloos liuhosi serbisu iha to’os eskolár ne’e, no mós atu bele fornese merenda eskolár ne’ebé prepara iha fatin ne’ebé moos. Sentina sira bele fahe entre labarik-mane no labarik-feto, no funsionáriu.
“Osan ba kontrusaun edifísiu foun ida ne’e, ami husi foinsa’e Austalianu na’in 2 ho naran Leo no Cezary, ne’ebé sa’e bisikleta no la’o hale’u Austrália tomak hodi rekolla fundus atu harii eskola ida-ne’e, sira halo ida-ne’e, tanba hakarak harii eskola iha-ne’e iha Builecon, inklui fatin sira seluk ne’ebé mak sira kontroi ona edifísiu eskola foun hamutuk 24 ona”, dehan S.E. Ministra Edukasaun.
Governante ne’e hatutan, manorin doben sira, favór keta haluha katak labarik sira-ne’e nia futuru iha ita-boot sira-nia liman. Nune’e, hanorin tuir oras no tuir kurríkulu. Respeita labarik ida-idak no buka atu koñese ida-idak nu’udar ema indivídu ida. Relasaun ne’ebé ita-boot sira kria entre manorin no estudante mak importante liu hodi asegura rezultadu aprendizajen ne’ebé di’ak, no mós dezenvolvimentu ba futuru sidadaun ne’ebé iha responsabilidade, respeita-malu, kriatividade, no abilidade atu komunika ho di’ak ho ema hotu-hotu.
Iha fatin hanesan, Leo ho Cezary hateten, ohin mai inagura eskola foun ida ne’e, sente re-memoriza filafali, bainhira lori bisikleta kuaze fulan 3 haleu Austrália hodi buka de’it osan atu halo apoiu ruma mai iha Timor-Leste, tanba senti rezilente liu atu apoiumai Timor-Leste, liuliu harii edifísiu eskola ba kiikoan sira atu bele aprende ho di’ak liután
“Apresia tebes ba ita hotu ne’ebé iha ne’e, tanba bele partilla ita-nia kultura no tradisaun, no fase sentimentu ba malu, no fiar katak, eskola ne’ebé ami apoiu, bele produz rekursu ne’ebé mak di’ak liu iha futuru ba nasaun ida ne’e nian”, dehan Leo no Cezary.
Hafoin inagura tiha edifísiu eskola foun ne’e, ekipa fahe mós pasta eskola nian, inklui lapizeira, kadernu, lapis no bola ba estudante sira hodi halibar, no mós seluk ne’ebé eskola ne’e presiza.
#MédiaME
