DILI – Kinta-Feira, 04/09/2025
Ministériu Edukasaun liuhusi Diretór Jeral Ensinu Sekundáriu no Diretór Nasional Ensinu Tékniku Vokasional hamutuk ho lideransa komunitária, Dirijente Eskola, manorin no estudante sira komemora aniversáriu eskola Ensinu Sekundária Jeral Públiku 4 de Setembro UNAMET Balide, Dili ba dala-21 iha resintu eskola refere.
Loron 4 de Setembro 1999 mak loron anúnsio rezultado husi referendu loron konsulta populár 30/09/199 ho votus rejeita otonomia 344,580 (78,5%) no aseita otonomia 94,388 (21,5%). Ho votus 344,580 (78,5%) mak Timor-Leste manan ninia independénsia ka ukun rasik an.
Iha festeza aniversáriu eskola ne’e, Diretór Jeral Ensinu Sekundáriu Sr. Deolindo da Cruz iha diskurso hateten, “sente onradu reprezenta Ministériu Edukasaun hodi selebra loron importante ida ne’e ba ita nia nasaun, eskola ida ne’e nia naran ho data istoriku no UNAMET hanesan simbolu moris nian hodi deside ita nia futuro”
Dirijente ne’e akresenta, “ba joven no estudante sira presiza hatene didiak loron istóriku sira, ita selebra loron ne’e hodi relembra pasadu no hamoris esperansa ba futuro”
Iha serimónia ne’e Ministériu Edukasaun entrega mos livru ho nia título “autodeterminasaun iha Timor-leste” ba eskola 4. Enkuantu eskola ESGP 4 de Setembro UNAMET, Balide, Dili kompostu husi Manorin 77 no Estudante 2276.
#JornalistaMateus
#FotoRolando
