Díli – loron, Sexta-Feira, 13 Setembru 2024
Sua Exelénsia Ministra Edukasaun Dra. Dulce de Jesus Soares, partisipa iha workshop hodi fahe esbosu planu estratéjiku tinan 5 nian ba Programa Edukasaun Multilinge (EMULI), husi rezultadu diskusaun ne’ebé foin lalais ne’e diskuti ona ho dirijente sira Ministériu Edukasaun nomós audiénsia xave sira, iha Salaun Ministériu Prezidénsia Konsellu Ministru, Palásiu Governu.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, programa IX Governu Konstitusionál nian mós espikula implementasaun programa EMULI iha Ministériu Edukasaun nian hodi hahú halo preparasaun di’ak tebe-tebes no uza mós esperiénsia sira iha tinan hirak liubá , tanba ne’e mak Ministériu Edukasaun hamutuk ho ekipa EMULI hamutuk hodi dezenvolve planu estratéjiku ba tinan 5.
“Bainhira Ministériu Edukasaun dezenvolve planu estratéjiku nasionál ba setór edukasaun nian planu estratéjiku EMULI nian mós sei enkuadra hotu iha planu setór edukasaun nian, nune’e hanesan esforsu ida tán mak Ministériu Edukasaun kontinua halo atu reforsa liután estudante sira-nia kualidade edukasaun iha Timor-Leste”, dehan S.E. Ministra Edukasaun.
Iha fatin hanesan, Sua Exelénsia Embaixadora Boavontade ba Asuntu Edukasaun, Dra. Kirsty Sword Gusmão, hateten, objetivu husi sorumutu ohin loron mak atu hasoru malu ho parseiru sira husi EMULI nian nomós ho dirijente sira Ministériu Edukasaun nian atu tau hamutuk ideia kona-ba planu estratéjiku Programa EMULI ba tinan 5 nian.
“Kontenti tebes, tanba iha diskusaun ne’e ativu tebe-tebes, atu bele identifika obstákulu ba prosesu hanorin no aprende literasia, no hatene ona katak área barak iha Timor-Leste, labarik sira nomós manorin balun ladún domina ho di’ak kona-ba lian ofisiál sira, nune’e sai hanesan barreira bo’ot ida ba sira atu kompriende konteiudu kurrikulár, nomós atu aprende lalais lee no hakerek”, dehan S.E. Embaixadora Boavontade.
Embaixadora ne’e hatutan, planu iha tinan oin estende programa ne’e husi eskola 10 ba eskola 66, bazeia ba pedidu ne’ebé Ministériu simu komunidade no eskola sira, tanba sira haree ho matan rasik ba labarik sira nia dezempeñu iha eskola EMULI aas tebe-tebes kompara ho eskola baibain. Planu estratéjiku ida ne’e sei enkuadra mós iha governu nia planu estratéjiku nasionál ba setór edukasaun ne’ebé besik atu renova ona.
#MédiaME
