Díli – Loron, Kinta-Feira 26 Dezembru 2024
Sua Exelénsia Ministra Edukasaun Dra. Dulce de Jesus Soares, partisipa iha serimónia funebre saudozu Tom Hyland ho kódigu “Malae Maubere”, husi nasaun Irlandia ne’ebé fó nia kontribuisaun maka’as ba luta libertasaun nasionál, no kontinua luta ba dezenvolvimentu Timor-Leste nian to’o hakotu iis. Serimónia funebre ne’e realiza iha Semitériu Públiku Becussi.
Saudozu Tom Hyland “Malae Maubere”, hetan ona kondekorasaun ho Orden Timor-Leste, hanesan rekoñesimentu ida ba saudozu nia partisipasaun iha luta ba libertasaun nasionál.
Saudozu Tom Hyland moris iha sidade Dublin, iha loron 12 outubru 1952, nia koñesidu servisu nu’udar motorista BUS sidade nian iha Dublin, saudozu hahú involve-an iha luta Timor-Leste nian, bainhira saudozu haree filmazen kona-ba akontesimentu Masakre Santa-Cruz iha tinan 1991, hafoin haree tiha filmazen ne’e saudozu komesa ba tuku odamatan iha sidade ne’e hodi husu ajuda liuliu mákina sira hodi hakerek karta no husu mós ema oinsá bele harii organizasaun ida ho fó soliedaridade ba ema seluk.
Hafoin ne’e saudozu harii organizasaun ida ho naran “East Timor Irland Solidarity Campain” iha tinan 1994, liuhusi organizasaun ne’e, saudozu komesa lobi governu Irlándia nian no to’o ikus governu konkorda hodi suporta nia kona-ba luta Timor-Leste nian ba ukun rasik-an.
Saudozu Tom Hyland, organiza mós demonstrasaun barak kontra okupasaun Indonezia nian iha Timor-Leste no demonstrasaun sira ne’e halo iha sidade Dublin, Londres, Alemaña no mós iha fatin seluk hodi ko’alia kona-ba Timor-Leste nia Independénsia.
Husi tinan 2000 mai leten Saudozu hela iha Dili, nu’udar sidadaun onoráriu hodi kontinua suporta timoroan sira no organizasaun sivíl sira no buka bolsu estudu ba timoroan sira hodi ba estuda iha Dublin. Saudozu mós hala’o servisu ida atu bele kesi metin relasaun entre Timor-Leste no Repúblika Irlándia liuhusi nia servisu permanente iha Ministériu Negósiu Estranjeiru no Kooperasaun to’o saudozu hakotu iss iha loron 24 fulan dezembru 2024, tanba moras komplikasaun.
#MédiaME
