Díli – Loron Tersa-Feira, 26 Novembru 2024
Sua Exelénsia Ministra Edukasaun Dra. Dulce de Jesus Soares hamutuk ho Embaixadora Xina iha Timor-Leste Wang Wenli no Reprezentante UNICEF iha Timor-Leste, Patrizia DiGiovanni, entrega mobiliáriu eskolár no materiál didátiku ba eskola EBC Sergio Viera de Melo ne’ebé afetadu husi inundasaun iha tinan 2021.
Iha entrevista, Sua Exelénsia Ministra Edukasaun Dra. DulcedeJesusSoares, hateten, Ministériu Edukasaun hetan doasaun husi Embaixada Xina, liuhusi jestaun UNICEF nian hodi entrega kadeira, meza ba estudante no profesór, armáriu, materiál didátiku sira no ekipamentu sira seluk hodi bele apoiu estudante sira-nia prosesu aprendizajen.
"Eskola EBC Sergio Viera de Melo mós afetadu ba inundasaun iha tinan 2021, mezmu agora iha ona tinan 2024, maibé sei kontinua mai reforsa eskola ida ne'e atu bele rekopera fila-fali sasan sira ne'ebé mak sira lakon iha tinan hirak liubá", dehan S.E. Ministra Edukasaun.
Governante ne'e hatutan, lori governu Timor-Leste nia naran liuhusi Ministériu Edukasaun, hakarak agradese ba UNICEF no Embaixada Xina, ne'ebé mak sai parseiru tinan naruk ona ho Ministériu Edukasaun hodi fó sira-nia apoiu iha área oioin, hanesan dezenvolvimentu kurríkulu, formasaun professores, inklui mós infrastrutura.
Iha fatin hanesan, Embaixadora Xina iha Timor-Leste, Wang Wenli, hateten, Governu Xina apoiu osan ho valór $ 364.000 liuhusi UNICEF, hodi apoia rekuperasaun eskola sira ne'ebé afetadu husi inundasaun 2021 nian inklui eskola EBC Sergio Viera de Melo, Becora.
"Materiál sira ne'ebé fahe inklui kadeira ba alunu hamutuk 2.000, kadeira no meza ba profesór hamutuk 204, estante livru hamutuk 204 no sasán eskritóriu nian oioin no sei entrega liután ba eskola hamutuk 34 husi Munisípiu Bobonaro, Covalima, Dili no Manufahi", dehan Embaixadora Xina iha Timor-Leste.
Aleinde ne'e, Reprezentante UNICEF, Patrizia DiGiovanni, hateten, eventu entrega materiál, ne'ebé mak rezultadu naruk husi viajen ne'ebé Ministériu Edukasaun lori ona hodi apoia rekuperasaun ne'ebé la'o hela iha eskola sira ne'ebé afetadu.
"Doasaun ne'e apoia husi Governu Xina, hodi ajuda priense nesesidade barak ne'ebé mosu husi destruisaun sira iha eskola, tanba dezastre. Doasaun sira ne'e inklui kadeira no meza ba estudante sira, meza ba profesór, sasan eskritóriu nian no seluk tán" dehan Reprezensa UNICEF.
#MédiaME
