Ermera, 04-09-2024
Sua exelénsia Sekratáriu Estadu ESJ-ESTV Sr. Domingos Lopes Lemos, partisipa iha serimónia pose ba Diretór Eskola no Adjutu EBC iha Salaun Administrasaun Munisípiu Ermera Quarta-feira ne'e.
Iha diskursu sua exelénsia Sekretáriu estadu ESG-ESTV hateten, ohin 4 de Setembru nu’udár loron importante ida ba ita-nia nasaun hanesan loron ne’ebé ita rona rezultadu Konsulta Populár ao mezmu tempu ba diretivas eskola sira ne’ebé simu pose ba kargu xefia iha eskola sira hodi asume ona responsabilidade ida, la siknifika katak ho kargu ne’ebé iha atu hadia de’it moris maibé oportunidade ne’ebé iha atu mellora di’ak liu tan kualidade ensinu iha eskola sira iha Munisípiu Ermera.
“Tanba ne’e mak ohin Ministériu Edukasaun fó ona konfiansa ba ita-boot sira atu lori konfiansa ida ne’e ba futuru jerasaun Ermera nian ne’ebé di’ak liu tan presiza responsabilidade, Dirijente sira Ministériu Edukasaun Nasionál to’o Baze. Kargu ida ne’ebé ita-boot sira hetan la’os oportunidade atu alkansa ita-boot sira-nia hakarak maibé responsabilidade ne’ebé mak Ministériu Edukasaun fó atu haklaken Misaun no Vizaun Edukasaun nian atu lori Timór nia-oan liuliu Ermera nia-oan ba futuru ida ne’ebé mak ita hakarak”.
Governante ne’e hatutan tan, Diretór no Direjente sira hotu nu’udár Direjente foun hatudu komportamentu, servisu ho komitmentu iha eskola sira hotu, espera katak durante tempu mandatu halo buat ruma di’ak, bele hasa’e persentazen labarik sira-nia matenek, ezekusaun ba orsamentu sira di’ak liutan, durante mandatu labele tuur iha fatin, motorizada iha ona bele ajuda servisu Dirijente sira nian, motorizada ne’e la’os pesoál ida nian maibé motorizada operasionál ba hotu-hotu bele uza atu kontrola ba prosesu aprendizajen iha eskola.
Iha fatin hanesan Autoridade Munisípiu Ermera Sr. José Martinho dos Santo Soares hateten, ho pose diretór eskola ho adjuntu EBC sira, ohin bele lori mudansa mai iha edukasaun Munisípiu Ermera.
“Autoridade másimu ne’e mos reafirma no husu ba diretór foun sira atu sai lideransa ne’ebé mak di’ak, tenki sai lideransa ne’ebé mak responsabilidade di’ak hodi muda ita nia-oan sira nia hanoin ba futuru ida ne’ebé mak di’ak” tenik PAM Munisípiu Ermera.
Entretantu Diretór Edukasaun Munisípiu Ermera Sr. Fransisko Marto da Cruz hateten, agredese ba Maromak tanba bele halo eventu boot ida ne’e iha Munisípiu Ermera hodi fó pose ba 200 direjente sira tanba ne’e agradese tebes ba Ministeriu Edukasaun no funsaun públika ne’ebé mak bele fó fiar mai hodi realiza pose ba tinan ida ne’e tan, tenik diretór ne’e.
Hafoin fó pose ba diretór no adjuntus EBC sira, sua exelénsia Sekretáriu Estadu ESG-ESTV ho direjente sira hodi entrega mós ekipamentus motorizajada ba kargu diretór foun sira ne’ebé mak heta pose.
Pose ba Diretór eskola no adjuntus EBC sira iha Munisípiu Ermera partipa mós husi Diretór Gerál Sr. Deolindo da Cruz, Diretór Nasionál ESG Sr. Benjamin F. Da Cruz, Diretór Nasionál ESTV Sr. Fernando M. Gama, xefe Gabinete Sekretáriu Estadu ESG-ESTV Sr. Napoleão dos Santo Lima, Xefe Executivu Sr. Marselino de Deus Maia, asesór gabineti Sekretáriu Estadu ESG-ESTV, Diretora Eskolar, Diretora Logistik, Reprejenta Diretora Rekursu Humanu, Diretór Munisípiu sira, Prezidente Autiridade Munisípiu Ermera Sr. José Martinho dos Santo Soares, emposado/a no familia sira.
#MédiaME.
