Projetu Basic Education Strengthening and
Transformation (BEST) ne’ebé finansiadu husi Global Partnership for Education (GPE) liuhosi Banku Mundiál iha Timor-Leste kontinua fó apoiu hodi hala’o formasaun kona-ba “Abilidade aprendizajen ba sékulu 21 (Introduction to 21st Century Skills) no formasaun Lideransa (LL3)” ba dirijente eskola ensinu báziku sira iha Munisipiu Ainaro. Formasaun lideransa ne’e abertura husi Prezidente INFORDEPE, Sr. Mestre Domingos Martins. Atividade formasaun ne’e realiza iha Salaun Administrasaun Autoridade Munisipiu Ainaro durante loron 4 (haat) hahú husi loron 21 – 24 fulan Maiu 2025.
Total partisipante iha formasaun ne’e hamutuk 132 dirijente kompostu husi dirijente Servisu Edukasaun Munisipiu Ainaro no dirijente eskola husi Ensinu Báziku mak hanesan; diretór servisu edukasaun munisipiu, superintendente, inspetóres, diretór eskola EBC, Adjuntu diretór, koordenadóres EBF, manorin feto potensiál, mentor munisipál no mentor lokál sira.
Iha formasaun lideransa nian énfaze liu kona-ba Lideransa Instrusionál ne’ebé ligadu ho vontade no paixaun husi lideransa eskola sira atu kria kondisaun ba manorin sira hodi halo mudansa signifikativa hodi hasa’e prestasaun aprendizajen ba estudante sira. Tema ba formasaun ne’e mak “LIDERANSA INSTRUSIONÁL LAOS KONA-BA HADI’A MANORIN SIRA,……. MAIBE NE’E KONA-BA KRIA KONDISAUN SIRA NE’EBÉ ATU MANORIN SIRA BELE HADI’A SIRA NIA-AN.”
