Dili, loron Tersa-feira 01 fulan Abríl 2025
Ministru Edukasaun Interinu Sr. Domingos Lopes Lemos, hamutuk ho Prezidente Komisaun Funsaun Públika, Sr. Agustinho Letêncio de Deús, fó pose ba profesór rekrutadu hosi bolsa kandidatura ba manorin-na’in Pre-eskolár no Ensinu Báziku na'in atus rua ne'en (206), iha salaun Ian Martin INFORDEPE, Díli.
Iha intervensaun Sua Exelénsia Ministru Edukasaun Interinu Sr. Domingos Lopes Lemos, hateten ho ksolok bo'ot mak ohin selebra marka signifikativu ida ba Edukasaun iha programa IX Governu Konstitusionál, preparasaun ida-ne'e reflete kompromisu Ministériu Edukasaun nian ba kualidade no futuru Edukasaun nian, hodi asegura katak profesór bele kontribui ba dezenvolvimentu.
"Tomada de pose ba profisionál edukasaun dedikadu sira-ne'e nu'udar pasu importante ida hodi hametin sistema edukativu, hodi reprezenta faze foun ida iha sira-nia moris no avansu promisór ida ba edukasaun pré-eskolár", dehan Governante ne'e.
Governante ne’e mos hatutan tan, responsabilidade profesór/a sira nian hakat liu transmisaun koñesimentu, ida-ne’e mós atu inspira labarík no foin-sa'e sira atu sai aprendiz durante moris tomak, professor iha responsabilidade atu forma hanoin sira, inspira sira, no haburas estudante ida-idak nia potensiál, reforsa ninia kompromisu atu apoia edukadór hotu-hotu iha trajetória ida-ne'e nia laran, hodi serbisu hamutuk atu asegura ambiente di'ak liu.
Fatin hanesan Prezidente Komisaun Funsaun Públika Sr. Agustinho Letêncio de Deús, hateten, Profesór la'ós oportunidade maibé ne’e vokasaun hadi'a ita-bo'ot sira-nia vokasaun didi'ak kontinua dedika ita-boot sira-nia an ba atu nune’e sai profesór/a ne'ebé sai kualidade ba Timor no ba jerasaun sira tuir mai.
Iha serimónia ne’e partisipa husi Dirijente Ministériu Edukasaun Nasionál no Munisipál, Prezidente INFORDEPE Sr. Domingos Martins, reprejentante Ministru Ensinu Superior no Família Emposada/o sira.
#MédiaME
