Díli, 24 Marsu 2025
Ministériu Edukasaun liu-husi Diretór Jerál Edukasaun Pré-Eskolár, Ensinu Báziku no Ensinu Rekorente Sr. Apolinário Serpa Rosa ho INFORDEPE halo abertura ba formasaun ba profesór sira husi ensinu Pré-Eskolár ne'ebé liu iha teste bolsa kandidatu no hetan xamada husi Ministériu Edukasaun, iha Salaun Ian Martin Matadouru.
Hafoin abertura Diretór Jerál EPEBER Sr. Apolinário Serpa Rosa hateten, ohin hala'o abertura formasaun ba profesór sira hamutuk 213 ne'ebé koloka ba iha edukasaun pré-eskolár no foti husi bolsa kandidatu ne'ebé ho valór 64 to'o 65.
"Objetivu husi formasaun ne'e atu hetan koñesimentu no informasaun sira bainhira profesór sira ne'e ba hala'o kna'ar iha eskola no formasaun ne'e hala'o durante semana ida", ténik DG EPEBER.
DG EPEBER ne'e argumenta, materia ne'ebé formandu sira sei hetan durante formasaun maka hanesan, Pedagójia, tempu, jestaun eskolár, oinsá uza fasilidade ICT iha prosesu aprendizajen nomós lei baze edukasaun nian.
Nune'e iha abertura ba formasaun refere dirijente sira ministériu edukasaun husu ba formandu sira atu akompaña formasaun durante loron lima ho didi'ak, nune'e bele hetan koñesimentu ne'ebé natón bainhira hanorin estudante sira.
#Média-ME
