Díli, 13 Maiu 2025 – Governu Konstitusionál da-9, liuhusi Sua Exelénsia Ministra Edukasaun Dra. Dulce de Jesus Soares, akompaña husi Reprezentante Komandante Jerál PNTL, Superintendente Xefe, Sr. Jorge Mendonça, hala’o impozisaun deviza ba membru Polísia Nasionál Timor-Leste (PNTL), hanesan forma apresiasaun no motivasaun ba sira-nia dedikasaun no prestasaun servisu ne’ebé di’ak durante tempu naruk, iha Munisípiu Covalima.
Iha serimónia impozisaun ne’e, Sua Exelénsia Ministra Edukasaun Dra. Dulce de Jesus Soares, hateten, ho prezensa lideransa PNTL no konvidadu sira seluk, fó hateten katak impozisaun diviza ne’e la’os de’it serimónia simbóliku, maibé reprezenta mós kompromisu governu nian atu valoriza no motiva efetividade seguransa iha rai-laran.
“Atu hatuur no hametin lei no ordem iha sosiadade Timor-Leste, la’os servisu ne’ebé kamaan, maibé dezafiu barak mak ita-boot sira hasoru durante kareira iha PNTL, tanba prova ita-boot sira-nia rezisténsia, dedikasaun no hamrik metin ba institusaun, tanba ne’e, membru sira ne’ebé simu diviza ohin loron, fó garantia katak sira sei kontinua servisu ho kapasidade no kompromisu hodi hetan konfiansa husi komunidade.” hateten Ministra.
Governante ne’e hatutan, impozisaun diviza ne’e sei sai hanesan motivasaun ba membru sira, atu kontinua hala’o sira-nia funsaun ho integridade, profisionalizmu no espíritu servisu públiku hodi garante estabilidade ne’ebé seguru no trankilu.
#MédiaME
