Dili, 26 Novembru 2025
Sua Exelénsia Ministra Edukasaun, Dra. Dulce de Jesus Soares, partisipa iha serimónia solene ba falesimentu Komandante – Xefe, Fidel Castro ba dala-9 hodi fó omenajen no reflete kona-ba ligasaun diplomátika ne’ebé kle’an tebes entre nasaun rua ne’e no mós lembra fali sorumutu importante iha tinan 2003 entre Fidel Castro, atuál Prezidente RDTL, J-Ramos Horta no atuál Primeiru Ministru RDTL, Kay Rala Xanana Gusmão, iha Kuala Lumpur, Malazia. Serimónia solene ne’e realiza iha Embaixada Cuba, Faról.
Iha diskursu, Sua Exelénsia Prezidente Repúblika, Dr. José Ramos Horta, subliña, Fidel Castro nu’udar jigante istória nian no jigante koñesimentu nian ne’ebé moris hela, kompara ho fígura ikónika sira hanesan Nelson Mandela no Sukarno. Maske ema bele iha diverjénsia ideolójika, maibé Fidel Castro nia impaktu iha palku mundiál no nia kompromisu ba umanidade, ezije respeitu universál.
”Fidel Castro nu'udar líder ida ne'ebé kuriozu tebes no apaixonadu ho koñesimentu luan kona-ba asuntu globál, agrikultura no dezenvolvimentu. Nia gaba Kuba nia solidariedade internasionál hodi nota katak maske hasoru dezafiun ekonómiku rasik no nu'udar nasaun ki'ik, maibé nasaun ne'e atua ona nu'udar superpoténsia ba ajuda umanitária”, dehan PR.
Sua Exelénsia Prezidente, Ramos-Horta subliña, oinsá interasaun ne'e tau fundasaun ba Brigada Médika Kubana ne'ebé sai transformadora iha Timor-Leste hodi fasilita ona treinamentu ba médiku timoroan na'in-700 resin no estabelesimentu eskola médika nasionál ida.
#MédiaME
