Dili, 17 abríl 2026
Sua Exelénsia Ministra Edukasaun Dra.Dulce de Jesus Soares partisipa iha aprezentasaun teste EGRA (Early Grade Reading Assessment) no EGMA (Early Grade Mathematics Assessment) ne'ebé ekipa husi Ministériu Edukasaun halo ba estudante sira iha eskola hotu iha munisipiu Liquiça.
Nune'e iha intevensaun Sua Exelénsia Ministra Edukasaun Dra.Dulce de Jesus Soares hatete, Ministériu Edukasaun forma ekipa pedagójika ida atu tun ba eskola sira hodi halo teste ba estudante sira kona-ba literásia no numerásia.
"Teste ida ne'e reflete ba estudante sira nia klase. Bainhira teste ba estudante sira iha klase ida ka (1⁰ ano)ekipa pedagójika sei halo teste ba materia Pre-Eskolár nian, ba klase daruak ka (2⁰ ano) maka sei fo teste ba materia klase ida nian no ba klase datoluk ka (3⁰ ano) sei fó teste ba materia klase daruak nian", Dehan Ministra.
Lider másimu edukasaun ne'e argumenta, agora dadaun Ministériu Edukasaun halo teste iha fulan fevereiru no marsu maibé sei halo teste fali iha fulan novembru hodi haree progresu estudante sira rezultadu durante tinan ida nia laran.
Enkuantu partisipa iha atividade aprezentasaun rezultadu ne'e maka Sekretária ba asuntu administrasaun no finansas, Diretór Servisu Edukasaun Munisípal, Diretór no koordenadór sira iha munisípiu Liquiça.
#EliasdaCosta
#MédiaME
