Dili, 07 Abríl 2026
Sua Exelénsia Ministra Edukasaun Dra.Dulce de Jesus Soares ho Diretór Nasionál Corpo da Paz Sr. Jamie Fouss asina nota entendimentu ba daruak nian hodi apoiu ba eskola sira liuliu iha lian inglés nomós jestaun eskolár.
Hafoin asina nota entendimentu, Sua Exelénsia Ministra Edukasaun Dra.Dulce de Jesus Soares ba jornalista sira hatete, Ministériu edukasaun halo kooperasaun ho corpo da paz husi Estadus Unidus hodi apoiu ba eskola sira liuliu iha lian inglés nomós jestaun eskolár.
"Agora dadaun ita iha membru Corpo da paz hamutuk na'in 19 mak oras ne'e dadaun iha Timor-Leste no na'in rua apoiu iha dezenvolvimentu kurikulu ba siklu datoluk nian hamutuk ho péritu nasionál sira no sira na'in 17 maka iha eskola sira", tenik SE.Ministra.
Govenante ne'e hato'o agradese tebes tanba ho membru Corpo da paz bele reforsa metodolojia hanorin profesór sira nian, jestaun sala de Aula nomós jestaun eskolár.
Iha sorin seluk Diretór Nasionál Corpo da Paz Sr. Jamie Fouss akresenta, asina nota entendimentu ida ne'e ho Ministériu Edukasaun atu nune'e halo kontinuasaun ba servisu hamutuk hodi suporta edukasaun liuliu iha lian inglés iha eskola siklu datoluk no ensinu sekundáriu.
Entretantu pesoál corpo da paz servisu hamutuk ho eskola sira hodi hadia profesór sira-nia jestaun sala de aula no metodolojia hanorin lian inglés nomós apoiu Ministériu Edukasaun iha dezenvolvimentu kurikulu ba siklu datoluk nian.
#EliasdaCosta
#MédiaME
