Dili, sábadu 18 abríl 2026
Sua Exelénsia Ministra Edukasaun Dra.Dulce de Jesus Soares ho Arsebispu Diózese Dili, Kardinál Virgílio do Carmo da Silva, SDB no Diretór Sáo José Operário, Padre César Magno inagura Eskola Ensinu Báziku Sentrál no Ensinu Sekundária Jerál Colégio São José Operário Balide.
Iha diskursu Sua Exelénsia Ministra Edukasaun Dra.Dulce de Jesus Soares hatete, Colégio São José sai instituisaun ida-ne’ebé sei kontinua hanorin estudante sira la’ós dixiplina akadémiku de’it, maibé oinsá sai ema ne’ebé morál, étiku, no hadomi ema seluk. Nune’e, ho kualidade sira-ne’e fiar katak estudante sira sei remata ho baze fundamentál ne’ebé habele sira atu hetan susesu iha sira-nia moris profisionál no privadu aban bainrua nian.
" Ita hotu hatene, Igreja Katólika mak instituisaun ne’ebé responsavel ba dezenvolvimentu barak iha ita-nia rain, espesialmente iha área saúde no edukasaun, no Colégio São José Balide mak sentru ida hosi sistema edukasaun Katólika durante okupasaun Indonézia, hodi fornese fatin iha-ne’ebé bele prezerva ita-nia identidade no valór sira", Tenik Ministra.
Governante ne'e esplika eskola São José kontinua sai eskola ida ne’ebé koñesidu ba exelénsia akadémiku, maski durante períodu instabilidade nasionál no haree eskola ida-ne’e hanorin duni valór sira-ne’ebé relasiona ho São José tanba São José rasik mak karpinteiru ida – no eskola ida-ne’e inspira duni ideia katak serbisu manuál no mós estudu intelektuál iha dignidade hanesan. Baze prinsipál ne’e sei enkoraja estudante sira.
Infrastrutura eskolár importante tebes – liuliu ba eskola Katólika no privadu sira, ne’e fó imajen di’ak ida katak eskola ne’e iha kualidade duni. No klaru, iha ezijénsia balu relasiona ho infrastrutura eskolár oras ne’e ne’ebé uluk laiha – sala-aula sira presiza kondíz ho aprendizajen ativu no kolaborativu, instalasaun sira presiza di’ak ba meiu-ambiente, ka “environmentally friendly” no agora ho énfaze ba literasia dijitál, eskola presiza iha konetividade internet.
#EliasdaCosta
#MédiaME
