Díli – Loron, Kuarta-feira 31 Jullu 2024
Ministériu Edukasaun liuhusi Koordenadora Gabinete Ministra, Sra. Benedita Martins, Diretór Ensinu Sekundáriu Jerál Sr, Benjamin F. da Cruz, Asesora Média, Sra. Jacinta Hanjam Corbafo hamutuk ho dirijente sira seluk, hala’o enkontru ho ekipa husi Rádiu Televizaun Timor-Leste. Empreza Públiku (RTTL.EP) hodi ko’alia kona-ba preparasaun sertame ne’ebé sei realiza iha tempu badak.
Iha enkontru ne’e, Koordenadora Gabinete Ministra Sra. Benedita Martins, hateten, programa sertame ne’e realiza, atu komemora vizésimu V aniversáriu konsulta populár, tanba ne’e Sua Exelénsia Ministra Edukasaun Dra. Dulce de Jesus Soares orienta Diresaun Jerál Ensinu Sekundáriu hodi hala’o programa sertame iha Rejiaun 3, hanesan Manatutu, Aileu no Ermera.
“Programa ida ne’e atu aumenta estudante sira-nia kapasidade no matenek la’os de’it iha sala laran, maibé sira bele hatudu ba sira-nia kolega, inan-aman ne’ebé durante ne’e apoiu sira-nia estudu no mós atu hatudu ba públiku katak estudante sira iha mentalidade hodi partisipa iha kompetisaun ba asuntu siénsia nian”, dehan Koordenadora Gabinete Ministra.
Iha fatin hanesan, Diretór RTTL.EP Horaçio Babo, hateten, RTTL.EP nia prezensa, mak oinsá bele apoiu téknika de’it no mós halo publikasaun ba atividade ida ne’e, atu nune’e bele motiva estudante sira atu estuda hodi bele kompete iha sertame ida ne’e.
Sertame rejionál ne’e koloka ba iha munisípiu tolu (3), hanesan Munisípiu Manatutu sei hahú iha loron 12 to’o 13, Aileu husi loron 14 to’o 15 no Ermera husi loron 16 to’o 17.
#MédiaME
