Baucau, 02/08/2024
Sua Exelénsia Ministra Edukasaun Dra.Dulce de Jesus Soares ho Prezidente Komisaun Funsaun Públika Sr. Agostinho Letêncio de Deus, akompaña husi Prezidente Autoridade Munisípiu Baucau Sra. Veneranda E. M. Lemos Martins, hamutuk ho dirijente Ministériu Edukasaun fó pose ba manorin ingresu espesiál ba rejime karreira dosente hamutuk 423 iha Munisípiu Baucau.
Iha diskursu Sua Exelénsia Ministra Edukasaun Dra. Dulce de Jesus Soares hateten, manorin di’ak ida sei uza nia kreatividade atu buka solusaun no mós fuan boot atu hadomi nia estudante sira hotu maski karik balun hatudu hahalok ne’ebé ladun di’ak. Manorin di’ak ida motivadu laos de’it tanba saláriu ka rekoñesimentu maibé husi ninia orgullu bainhira nia estudante domina kompeténsia foun ida bainhira sira envolve an iha atividade aprendizajen ruma ho kontente.
“Manorin sira tenki hala’o sira-nia knaar ho responsabilidade másimu atu eduka povu Timór nia oan ne’ebé mak monu iha sira-nia liman, tanba povu Timór nia oan ne’ebé mak agora estudante, sira mak futuru rai ida ne’e nian, kuandu ita eduka sira ho di’ak, signifika katak ita bele iha futuru jerasaun líder ida ne’ebé mak sei ukun rai ida ne’e ho di’ak tebes”. Tenik Ministra Edukasaun
Iha fatin hanesan, Prezidente Komisaun Funsaun Públika Sr. Agostinho Letêncio de Deus esklarese, polítika ida ne’ebé mak Ministériu Edukasaun halo, mak ohin loron ita bele rezolve duni problema Edukasaun nian, maske seidauk finál, maibé ita ultrapasa ona problema lubuk ida, li-liu estatutu voluntáriu nian.
Alíende ne’e, Prezidente Autoridade Munisípiu Baucau Sra. Veneranda E. M. Lemos Martins informa, Ministériu Edukasaun hala’o nia papél tuir programa IX Governu Konstituisionál nian, no fó oportunidade ba Timór oan hotu-hotu ne’ebé iha samamentu atu sai manorin na’in, tanba manorin ne’e vokasaun ida.
Remata tiha serimónia termu aseitasaun no fó pose ba manorin ingresu espesiál ba rejime karreira dosente, Sua Exelénsia Ministra Edukasaun Dra. Dulce de Jesus Soares ho Prezidente Komisaun Funsaun Públika Sr. Agostinho Letêncio de Deus, akompaña husi Prezidente Autoridade Munisípiu Baucau Sra. Veneranda E. M. Lemos Martins, ekipa husi Ministériu Edukasaun, ekipa husi Komisaun Funsaun Públika ho manorin ingresu espesiál sira, partispa fali misa agradesimentu ba manorin ingresu espesiál sira iha Igreja Katedral Baucau.
Nune’e serimónia termu aseitasaun no fó pose ba manorin ingresu espesiál ba rejime karreira dosente iha Munisípiu Baucau ne’e, partisipa husi Sua Exelénsia Ministra Edukasaun Dra. Dulce de Jesus Soares ho Prezidente Komisaun Funsaun Públika Sr. Agostinho Letêncio de Deus, akompaña husi Prezidente Autoridade Munisípiu Baucau Sra. Veneranda E. M. Lemos Martins, ekipa husi Ministériu Edukasaun, ekipa husi Komisaun Funsaun Públika, manorin ingresu espesiál sira, no família husi manorin ingresu espesiál sira.
#Média ME
