Manufahi – loron, kuarta-feira, 28 agostu 2024
Sua Exelénsia Ministra Edukasaun Dra. Dulce de Jesus Soares hamutuk ho Autoridade Lokál, profesór no estudante sira iha Aldeia Fahi-Luhan, Suku Holarua, Postu Administrativu Same, Munisípiu Manufahi, hodi selebra loron 30 agostu 1999 da dala-25, liuhusi konta istória husi sasin sira hodi reflete fila-fali akontesimentu sira iha pasadu.
Iha serimónia ne’e Sua Exelénsia Ministra Edukasaun Dra. Dulce de Jesus Soares, husu ba estudante sira atu tau atensaun di’ak ba istória sira ne’ebé sasin na’in sira konta, nune’e bele kuda iha fuan espíritu nasionalizmu, patriotizmu, étika no morál hodi bele valoriza no dignifika eroi no eroina sira-nia luta a libertasaun nasionál.
Hafoin remata tiha serimónia ne’e Sua Exelénsia Ministra Edukasaun Dra. Dulce de Jesus Soares fahe mós ai-han komplementár ba família vulnerável no mós entrega kadeira hamutuk unidade 60, meja unidade 60 inklui livru ba Eskola Ensinu Báziku Sentrál (EBC-sigla portugés) Suri-Rema hodi bele fasilita estudante sira-nia prosesu aprendizajen iha sala aula.
Remata tiha atividade iha suku Holarua, Sua Exelénsia Ministra Edukasaun Dra. Dulce de Jesus Soares hamutuk ho ekipa kontinua viajen ba Suku Letefoho, Aldeia Kotalala hodi fahe mós ai-han komplementár ba família vulneravel inklui kadeira unidade 105, meza unidade 105 no livru ba Eskola Ensinu Báziku Filiál (EBF) Cablaque.
#MédiaME
