Dili, 01/04/2024- Exelénsia Ministru Edukasaun Interinu Sr. Domingos Lopes Lemos halo lansamentu ba programa merenda eskolár tinan Letivu 2024 iha Eskola Bázika Sentrál Faról, segunda-feira ne'e.
Iha abertura Prezidente Autoridade Munisípiu Dili Sr. Gregório Saldanha hatete, programa ida ne’e atu ajuda estudante sira hodi aguenta sira-nia saúde durante prosesu aprendizajen.
Programa ida ne'e atu hodi ajuda ita-nia oan sira-nia eskola liuliu ba sira ne'ebé mak presiza liu kona-ba sira-nia kondisaun família ne'ebé mak susar dala ruma matabixu tarde no la biban, ho merenda eskolár ne'e atu hodi ajuda ita-nia oan sira tuir no simu matéria ho di'ak". Dehan Prezidente Autoridade Munísipiu Dili Sr. Gregório Saldanha.
Aléinde ne’e diretora EBC Faról Sra. Filomena Fátima Belo Freitas reafirma, parte eskola nian sente orgullu tebetebes, tanba serimónia abertura programa merenda eskolár ne’e mai iha eskola ida ne’e.
Fatin hanesan Exelénsia Ministru Edukasaun Interinu Sr. Domingos Lopes Lemos hatete, Lansamentu ba programa Merenda Eskolár iha Munisípiu Dili ohin hala’o ho diresaun merenda eskolár. Nune'e sei halo sosializasaun di’ak liután, tanba iha ona manuál ne’ebé mak di’ak tebetebes liuliu ba produtu lokál sira ne’ebé mak atu fó ba estudante sira tanba labele ábitu ho produtu kímiku sira.
"Governu dasiak iha ona Manuál merenda eskolár ne’ebé mak di’ak, liuliu oinsá atu utiliza produtu lokál ba estudante sira, no evita uza produtu kímiku hodi fó ba estudante sira", katak Governante ne'e.
Governante ne’e esplika, sistema merenda eskolár iha tinan hirak liubá kotuk, profesór/a sira mak implementa diretamente, maibé daudaun ne’e Ministériu edukasaun kria programa ekipa Jestaun programa (EJP).
Enkuantu Eskola Bázika Sentrál Faról hamutuk 5,325 estudante.
#jornalistarita
#MédiaME
