ME HALO ABERTURA KONA-BA FORMASAUN KOMUNIDADE SÓSIU-KULTURÁL ASEAN

S.E. Ministra Edukasaun Dra. Dulce de Jesus Soares halo abertura kona-ba formasaun Komunidade Sósiu-Kulturál ASEAN nian (ASCC sigla inglés) ho objetivu atu hasa’e liután koñesimentu dirijente ministériu nian hodi reforsa prosesu adezaun ba ASEAN, formasaun ne’e realiza iha salaun MSS, segunda-feira ne’e.

Iha entrevista, S.E. Ministra Edukasaun Dra. Dulce de Jesus Soares hateten, formasaun ohin ho nia objetivu atu fó sai ba dirijente sira iha Ministériu Edukasaun husi nível Diretór Jerál, Diretór Nasionál nomós ho unidade relevante sira atu bele iha kompriensaun liu kona-ba lala’ok ASEAN nian.

“Matéria sira ba formasaun mak istória kona-ba ASEAN nian, prosesu saida mak Timor-Leste tenki kumpri para atu bele reforsa liután prosesu adezaun ne’e no di’ak, tanba prosesu adezaun ne’e kada ministériu iha nia papél rasik, nune’e ajuda tebes atu bele reforsa liután servisu Ministériu Negosiu Entranjeiru no Kooperasaun nian”, dehan S.E. Ministra Edukasaun.

Governante ne’e hatutan, Ministériu Edukasaun hola parte tiha ona iha “Organisação dos Ministros da Educação do Sudoeste Asiático” no halo ona formasaun barak tebes ho sira hanesan pontu importante ida hodi bele kontribui prosesu adezaun ba ASEAN.

Enkuantu, formasaun ne’e la’o durante loron tolu (3) hahú husi loron 04 to’o loron 06 fulan marsu no formandu sira hamutuk na’in 87 husi Ministériu Edukasaun no Ministériu Ensinu Superior, Siénsia no Kultura