Atauru – Loron Tersa-Feira, 06 Agustu 2024
Sua Exelénsia Ministra Edukasaun Dra. Dulce de Jesus Soares, hala’o vizita ba Eskola lima iha Suku Biqueli no Beloi, hanesan Ensinu Báziku Sentrál (EBC) Biqueli, Pré-Eskolár Biqueli, Eskola Sekundáriu Nicolau Lobato Atauru, Ensinu Báziku Sentrál (EBC)10 no 30 síklu Pérola no Ensinu Báziku Filiál (EBF) Beloi, hodi haree kondisaun eskola no mós hala’o teste literasia no numerasia ba estudante sira.
Iha vizita ne’e, Sua Exelénsia Ministra Edukasaun Dra. Dulce de Jesus Soares, hateten, iha eskola EBF balun mak sei falta manorin, maibé Ministériu Edukasaun iha ona lista tuir kuadru pesoál no iha tempu badak sei destaka profesór sira mai hodi bele reforsa eskola sira ne’ebé sei menus profesór.
“Ha’u husu ba oan sira atu kumpre regra sira ne’ebé mak iha no profesór sira mós hanorin ho fuan laran no domin, atu nune’e ita-nia oan sira bele ba oin ho di’ak no prepara sira atu bele kontinua dezenvolvimentu iha ita-nia rai”, dehan S.E. Ministra Edukasaun.
Governante ne’e hatutan, eskola balun iha Suku Biqueli nian preokupa kona-ba sala aula balun seidauk iha no balun iha ona sala aula, maibé presiza kadeira no meza. Iha eskola sira ne’ebé vizita estudante barak mak hatene lee no hakerek, profesór no estudante sira ne’e edukadu tebes liuhusi maneira simu no ko’alia.
#MédiaME
