ME HALA’O ENKONTRU HO DIRIJENTE SIRA HODI KO’ALIA KONA-BA REGRA SIRA BA IMPLEMENTASAUN ORSAMENTU
Díli, 19/02/2024 – Ministra Edukasaun Dra. Dulce de Jesus Soares no Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hala’o enkontru ho Dirijente sira Ministériu Edukasaun nian hodi ko’alia kona-ba regra sira ba implementasaun orsamentu atu bele kompriende oinsá uza orsamentu refere.
Iha enkontru ne’e, Ministra Edukasaun Dra. Dulce de Jesus Soares hateten, tama ona ba faze ezekusaun orsamentu, importante tebe-tebes ba dirijente sira hotu atu kompriende kona-ba lei ezekusaun orsamentu, nune’e servisu sira bele bazeia ba regra.
“Kuandu ita kompriende iha ita-nia ezekusaun ne’e ita halo ho kuidadu bazeia ba regra, tanba ne’e mak ha’u ho Sekretáriu Estadu hanoin katak antes ita uza osan 2024 nian mak importante atu ita hotu kompriende kona-ba regra uju orsamentu nian”, dehan Ministra Edukasaun.
Governante ne’e mós husu ba dirijente sira atu bele dezenvolve ‘template’ ruma atu uza bainhira ba monitoriza asuntu ruma hodi bele hatene katak saida mak atu halo ne’e klaru ona no balun tau narativa ruma kona-ba atividade ne’e, nune’e bele ajuda hodi jere katak uza orsamentu ne’e ho efetivu, nune’e bele atinji ezekusaun ho kualidade iha tinan 2024.
Iha fatin hanesan Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hateten, presiza iha komunikasaun ba malu ho di’ak hodi bele implementa orsamentu ne’e ho máximu no efetivu, maske fazeadamente, maibé tenki rezolve tuir etapa ne’ebé mak di’ak.
