ME FÓ POSSE BA MANORIN INGRESU ESPESIÁL HAMUTUK NA’IN 630
Ermera, 24/02/2024 – Ministra Edukasaun Dra. Dulce de Jesus Soares no Sekretériu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos fó posse ba manorin na’in sira hamutuk na’in 630 ba ingresu espesiál, iha Salaun Autoridade Munisípiu Ermera, Postu Administrativu Gleno.
Iha diskursu, Ministra Edukasaun Dra. Dulce de Jesus Soares hateten, manorin na’in di’ak ida koñese nia estudante idak-idak kona-ba pontu forte, fraku, interese no personalidade, nune’e halo esforsu hodi tulun estudante sira atu atinji nia potensiál ho máximu.
“Manorin di’ak ida sei uza ninia integridade atu buka solusaun nomós iha fuan bo’ot atu hadomi estudante sira hotu mesmu balun hatudu hahalok ida ne’ebé lagosta , manorin di’ak ida motivadu la’os tanba saláriu ka rekoñesimentu, maibé ho sira nia orgullu bainhira ninia estudante domina kompeténsia foun ida ka bainhira sira involve-an iha atividade sira”, dehan Ministra Edukasaun.
Governante ne’e hatutan, durente halo vizita ba eskola sira, hetan manorin balun hanorin lahó laran no dalabarak haree eskola sira la organizadu la iha hijiene, manorin balun ba eskola tarde no fila sedu hodi abandona estudante sira no balun lahanorin tuir kuríkulu ne’ebé vigór.
Iha fatin hanesan Sekretériu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hateten, manorin sira tenki hatudu imi nia matenek no hatudu imi nia espíritu manorin na’in nian hodi lori estudante sira ba dalan matenek nian.
“Loron hirak antes 120 dias Ministériu Edukasaun no Komisaun Funsaun Públika esforsu hodi halo prosesu to’o ohin loron imi mai simu posse no simu responsabilidade ida ne’ebé bo’ot no la’os ki’ikoan, liuhusi imi nia jura ba maromak, ba nasaun atu bele hanorin ho fuan no responsabilidade ba timoroan hotu”, dehan Sekretáriu Estadu.
Hafoin remata tiha serimónia termu aseitasaun no posse ba manorin sira ingresu espesiál, Ministra Edukasaun Dra. Dulce de Jesus Soares no Sekretériu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos kontinua halo vizita ba Eskola Ensinu Tékniku Vokasionál Ernesto “DUDU”, Gleno Munisípiu Ermera.
