Bobonaro, 04 Dezembro 2024
Ministériu Edukasaun liuhusi Xefe Departamentu Pre-Eskolár Sr. Leopoldo dos Santos de Jesus ho ekipa fasilita formasaun ba inan-aman sira kona-ba programa intensivu durante loron rua no partisipa husi inan-aman no autoridade lokál iha Aldeia Oalgomo, Suku Ai-Assa, Postu Administrativu Bobonaro
Iha formasaun ne’e, Xefe Departamentu Pre-Eskolár Sr. Leopoldo dos Santos de Jesus hateten, objetivu husi programa intensivu ida ne’e, atu tulun oan sira ne’ebé la asesu ba iha pre-eskolár nomós iha formasaun ne’e ko’alia kona-ba inan-aman sira nia apoiu ba oan ninia dezelvolvimentu aprendisajen iha eskola.
“Programa edukasaun ne’e, importante tebes ba inan-aman sira oinsá bele hetan koñesimentu natón atu tulun ita nia oan ne’ebé aprende iha eskola nomós apende iha uma, ema hot-hotu iha koñesimentu jerál ida katak edukasaun mak sai xave dahuluk ba ema individu ida-idak”. Dehan Xefe Departamentu ne’e iha suku Ai-assa
Iha fatin hanesan Xefe Suku Ai-assa Sr. Juvinal Monis Martins Marques dehan, programa intensivu di’ak tebes ba komunidade tanba ho programa ida ne’e bele fó edukasaun ida ne’ebé mak husi tinan lima (5) mai kraik bele hatene lala'ok kona-ba oinsa edukasaun iha nível báziku nian.
“Ha’u hanesan autoridade lokál nia haree ba iha edukasaun pre-eskolár maske matéria ne’e ita haree ba labarik sira halimar maibé halimar ida edukativu bele hatene koñesementu baziku, oinsá bele respeita ema no bainhira hasoru inan-aman no komunidade sira, fó bondia no boatarde ida ne'e mós hola parte ba prosesu edukasaun nian”. Tenik Xefe Suku Ai-assa ne’e
Autoridade lokál ne’e sente orgullu tebes ho programa intensivu ne’e, ba futuru sira hakarak programa ne’e labele para de’it iha tinan 2024, maibé sira presiza iha kontinuasaun ba iha tinan 2025 to’o 2026 tanba iha suku refere labarik sira husi tinan haat (4) to’o tinan lima (5) barak tebes nune'e presiza tebes programa intensivu atu loke iha suku ne’e.
Iha abertura programa intensivu ne’e, hetan partisipasaun másimu husi Xefe Departamentu Pre-Eskolár Sr. Leopoldo dos Santos de Jesus no Xefe Suku Ai-Assa Sr. Juvenal Moniz Martins Marques, Inspetór Pre-Eskolár Sr. Paulo de Assis, inan-aman sira iha Aldeia Oalgomo, Suku Ai-Assa, postu administrativu Bobonaro.
#MÉDIAME
