RAEOA - Kuarta-feira, 21/08/2024
Ministériu Edukasaun liu husi Gabinete Avaliasaun Lisensiamentu Akreditasaun (GALA) divulga Prosedimentu, Padraun no Kritéria Lisensiamentu ba Estabelesimentu Edukasaun no Ensinu ba Diretór no Inspetór Eskolár sira, inklui prezidenti fundasaun eskola privadu no eskola katólika sira iha salaun SREAS-RAEOA.
Iha atividade formasaun ne’e, Reprezentante Koordenadór GALA Carlos Salsinha hateten, ohin Ministériu Edukasaun liu husi GALA mai halo divulgasaun kona-ba prosedimentu atu estabele edukasaun no ensinu, atu dehan katak iha pasadu ema loke eskola tuir nia hakarak maibé agora Ministériu Edukasaun iha GALA atu atende administrativu atu loke eskola tuir kritéria ne’ebé iha.
Aleinde ne’e Sekretária Rejionál Edukasaun no Asunto Sosiál RAEOA, Inácia Tamele hateten, apoiu ida ne’e pasu ida importante tebes, tanba hare’e ba realidade ne’ebé mak akontese, eskola loke hanesan kios, dalaruma iha suko ida loke ESG rua, tan ne’e ho prezensa ekipa husi nasionál ne’e husu ba dirijenti no responsável eskola sira atu rona didi’ak, tan prezensa IX Governo iha RAEOA ne’e atu halo mudansa no fó solusaun la’os atu kria tan problema.
Objetivu husi divulgasaun informasaun ne’e rasik atu fó hatene ba públiku oinsa atu loke eskola ida tenki prienxe rekezitu sira hodi garante ambiente ne’ebé seguro no saudável ba labarik sira.
Enkuantu atividade ne’e abertura husi Sekretária Rejionál Edukasaun no Asunto Sosiál RAEOA, Inácia Tamele no ensera husi Sub-Inspetór Jerál Ministériu Edukasaun no partisipa másimu husi dirijenti Edukasaun Rejionál RAEOA.
#Média-ME
##JornalistaMateus
