*LIKISÁ, 22 JULLU 2026* – Institutu Nasionál Formasaun Dosente no Profisionál Edukasaun (INFORDEPE) ofisialmente hala’o abertura ba atividade Formasaun Reforma Kurrikular ba Klase da-8 iha Eskola Ensinu Báziku Sentrál (EBC) São João de Brito Liquisá, Munisípiu Likisá.
Polítika ida-ne’e atu hadi’a kualidade kurrikulu no garante prosesu aprendizajen hodi responde di’ak liubá nesesidade edukasaun iha Timor-Leste.
Iha abertura, Xefi Departamentu Gabinete Formasaun Akadémika INFORDEPE, Raul Viçente, konfirma katak objetivu prinsipál husi reforma kurrikulu nian maka atu prepara jerasaun foun.
_“Objetivu prinsipál husi reforma kurrikulu nian maka ita nia oan sira bele adapta an ho metodolojia foun ne’ebé nasaun avansadu sira halo. Nune’e Timor-Leste mós labele atraza liu. Timor-Leste mós bele adapta aan ho nasaun dezenvolvidu sira iha ASEAN nia laran,”_ nia hatete.
Mudansa prinsipál iha reforma kurrikular ida-ne’e maka sistema aprendizajen ne’ebé sentra ba estudante. Iha modelu foun ne’e, manorin sira orienta de’it 25% no estudante sira mak partisipa 75% iha prosesu ensinu no aprendizajen. Estudante sira tenke buka rasik matenek no koñesimentu ne’ebé presiza.
Iha fatin hanesan, Inspetór Eskolár Postu Administrativu Likisá, Agustino Alves do Santos, hatete katak formasaun ne’e foku ba dezenvolvimentu kompeténsia sira.
_“Objetivu prinsipál husi formasaun ne’e maka oinsá atu diresiona alunu sira bele iha pensamentu krítiku, oinsá sira atu bele buka solusaun atu bele rezolve problema ruma. Ida-ne’e atu prepara estudante sira la’ós de’it ba ensinu superiór, maibé mós ba kampu traballu,”_ nia esplika.
Aleinde ne’e, Formadór Nasionál, Remizio António Soares, subliña katak Kurríkulu Foun ne’e parte husi Polítika IX Governu Konstitusionál, liu-liu Ministériu Edukasaun. Kurríkulu ne’e bazeia ba nesesidade abad XXI no inklui sistema avaliasaun foun ne’ebé haree ba estudante sira nia kapasidade, abilidade no projetu sira.
Enkuantu ne’e, partisipante hamutuk 45 maka partisipa iha formasaun ne’e. Sira fahe ba área espesífiku tolu: *Matemátika* ho partisipante 17 kompostu husi mane 12 no feto 5, *Edukasaun Fízika* ho partisipante 13 hotu-hotu mane, no *Saúde no Bem-estar* ho partisipante 15 kompostu husi mane 8 no feto 7.
#MediaME/Justino Neno Quefi
